د افغانستان امنیتي او دفاعي سکتور ویاند اجمل عمر شینواري نن په کابل کې د یوه خبري کنفرانس پر مهال وویل، هغه کسان چې د نظام له دننه مخالفینو سره مرسته کوي، ملي خاینین دي او دغو کسانو ته به دعدلي او قضايي اورګانونو له لوري د قانون په چوکاټ کې سزا ورکړل شي.
شینواری وايي، د هغو کسانو لپاره چې د نظام له مخالفینو سره مرسته کوي، په نظامي برخه کې صحرايي محکمه شته،خو په وینا یې دوی د هېواد اساسي قانون ته ژمن دي.
شینواري زیاته کړه:« هرهغه څوک چې په جګړه ییزو شرایطو کې له دښمن سره مرسته کوي هغه ملي خیانت دی او دملي خیانت په جرم باید محکمه شي چې په هرچا ثابته شوه هغه به محکمه کیږي او دا دمحکمې صلاحیت دی چې څه ډول سزا ورکوي او په جګړیزو شرایطو کې به له هیچا سره مراعت نه کیږي او حتي موږ په پوځي برخه کې صحرایي محکمې هم دایرولای شو.»
په ورته وخت کې شینواری وايي، افغان پوځ په تېرو درې ورځو کې لسګونه واړه او غټ عملیات ترسره کړي، چې په ترڅ کې یې له ۱۳ سوو زیات وسله وال وژل شوي، څه باندې ۶۰۰ ټپیان دي او لسګونه نور یې ژوندي نیولي دي.
شنیواری زیاتوي:« د دې عملیاتو په جریان کې ۱۳۶۹ طالبان وژل شوي دي، چې په کې د دوي کلیدي نظامي او استخباراتي افراد هم شامل دي. ۶۰۵ تنه نور ټپیان شوي دي، ۴۹ تنه یې ژوندي نیولي او ۷۱ حلقې ماینونه یې کشف او خنثي کړي دي .»
هغه وايي، د پلازمینې کابل د امنیت لپاره پرمختللی دفاعي سیستم فعاله شوی او د هر ډول واړه او ستر توغندیز برید د خنثي کولو وړتیا لري.
شنواری وايي:« دا وسله داسې خاصیت لري،چې له هرځای راکټي برید وشي، خبر ورکوي دتوغول شویو مزایلو ځای تثبت کوي او کولای شي،چې ټول راکټي بریدونه دفعه کړي.»
د امنیتي او دفاعي سکتور ویاند وايي، وسله وال پوځ د خلکو د امنیت او له هېواده د دفاع لپاره بشپړ چمتوالی لري او د هغو سیمو د بېرته نیولو لپاره یې منظم پلان جوړ کړی،چې تازه له لاسه وتلې دي.
