یوازې لرې پرتې غرنۍ سیمې نه دي، بلکې دا مهال په لویو ولسوالیو او ولایتونو کې هم خلک شکایت کوي چې ډېری روغتیایي مرکزونه د ډاکټرانو له کمښت سره مخ دي.
دغه شکایتونه داسې مهال کېږي چې تازه د کابل طبي پوهنتون له شپږو بېلابېلو پوهنځیو ۲۳۰ تنه فارغ شول، چېد ریاست الوزرا سیاسي مرستیال مولوي عبدالکبیر وايي، د ولايتي مرکزونو په شمول به په لرې پرتو سیمو کې پر دندو وګومارل شي.
عبدالکبیر وايي، که څه هم په تېرو جګړو کې روغتیايي سیسټم د مافیايي کړیو له خوا له کاره غورځول شوی و، خو اوس هڅې روانې دي چې دا سکټور بېرته پر پښو ودرول شي.
د عبدالکبیر په خبره، په لرو پرتو سېمو کې روغتیايي مرکزونو ته زیاته اړتیا ده او له دې سره څنګ کې د وړ او مسلکي کسانو ګومارنې ته هم اړتیا لیدل کېږي.
هغه زیاتوي:« تاسو داسې مهال د افغانانو د درملنې لپاره له پوهنتون څخه فارغ شوي یاست چې د افغانستان د روغتیايي سکټور پرخلاف له څو لسیزو راهیسې پروپاګند شوی او دغه سیسټم یې بې اعتباره کړی. په تېرو څو لسیزو کې مافیايي کړیو د افغانستان روغتیايي سیسټم له کاره غورځولی و، مسوولیت مننونکی نه و، د روغتیايي خدمتونو کیفیت ټیټ او دولتي روغتیايي مرکزونه له ستونزو سره مخامخ وو.»
په ورته مهال، د لوړو زده کړو وزارت سرپرست د روغتیايي مرکزونو پر پښو درول د سرپرست حکومت له کاري لومړيتوبونو ګڼي او په خبره يې هڅه کوي، چې په دې برخه کې د وړتیا او مسلک پر بنسټ خلک پر دندو وګوماري.
د لوړو زده کړو وزارت سرپرست ندا محمد ندیم وايي: « پر خپل روغتیايي سیسټم باندې د خلکو د باور جوړول اړین دی، کنه د هرې کوچنۍ ناروغۍ لپاره به هم خلک نورو هېوادونو ته ځي، ځکه وايي دلته ډاکټران نه شته. موږ هڅه کوو له نړۍ سره په روغتیايي برخه کې ګډ پروګرامونه ولرو.»
چارواکي له کابل طبي پوهنتون څخه تازه فارغو شویو ځوانانو ته ډاډ ورکوي چې ټول به په اړینو بستونو کې پر دندو ګومارل کېږي او هېڅ یو به بې دندې پاتې نه شي.
دغه راز دوی د درملو له وارېدوونکو شرکتونو غوښتنه وکړه چې د بې کیفیته درملو له واردولو څخه دې په کلکه ډډه وکړي.
دوی له نړیوالو مرسته کوونکو موسسو او بنسټونو هم وغوښتل چې په لرې پرتو او غرنیو سېمو کې دې له روغتیايي مرکزونو سره مرسته وکړي ترڅو روغتیايي سکټور پر پښو ودرېږي.
