د پکتیا سوداګرۍ خونې مشر نصیر علم یار وايي، ولایت مقام د مرکزي حکومت په شفاهي حکم له تېرو څلور ورځو راهیسې د پټان لویه لاره تړلې ده.
د علم یار په خبره، له همدې امله په مرکز ګردیز او پښتونخوا کې سلګونه موټر بار ولاړ دي.
علم یار زیاته کړه: « شااوخو ۶۰۰ باربري موټرونه د وارداتو او همدارنګه د صادراتو چې کوم توکي دي، د پکتیا یا له نورو ولایتونو چې کوم توکي راځي او پاکستان ته صادرېږي، همدا اوس ولاړ دي.»
پټان ګمرک له یوې میاشتې راهیسې د طالبانو ولکه کې دی او سوداګر وایي، حکومت له همدې کبله لاره تړلې ده .
دوی زیاتوي،چې د طالبانو له لوري پټان کې د پیسو اخېستل نوې خبره نه ده او له کلونو راهیسې بېلابېلو سیمو کې له بار وړونکو موټرو پیسې اخلي.
یو تن سوداګر وايي:« دوی له موږ پیسي اخلي. هر ځای کې چې راووځي، ځایونونه یې مالوم دي. دوی پارچې ورکوي او دولت هم پرې خبر دی. له هغوی سره زموږ د تجارانو وس نه رسېږي.»
بل پلو د پکتیا والي ګل نبي احمدزی وایي، د پټان لویه لاره د لنډې مودې لپاره تړل شوې او دوی نه غواړي،چې طالبان له بار وړونکو موټرو پیسې واخلي.
احمدزي زیاته کړه:« موږ پټان کې ستونزه لرو. موږ نه غواړو،چې د تجارانو پيسې او یا د حکومت ملي عواید، چې زموږ او ستاسو ملي سرمایه ده، د بل چا جیب ته لاړه شي او بېرته زموږ پر ضد وکارول شي.»
د حکومت له لوري یو شمیر ولایتونو کې د لویو لارو بندیدو له کبله له یوې خوا د ګمرکونو په عوایدو کې کموالی راغلی او له بل لوري بازارونو کې د بېلابېلو توکو بیې لوړې شوي دي.
