په اروپایي هېوادونو کې د افغان کډوالو د برخليک په اړه د یو شمېر هېوادونو او سازمانونو دریځ بدل شوی.
وروسته له هغې چې جرمني په يوه تازه اقدام کې ۲۸ افغان کډوال له خپلې خاورې وایستل، اتریش د دې کار هرکلی کړی او وايي، له جرمني سره په ګډه به پر جرمونو د تورن افغان کډوالو پ ايستلو کار وکړي.
خو د بښنې نړیوال سازمان له جرمني د افغانانو د یوې ډلې ایستلو په غبرګون کې دغه کړنه له نړیوالو قوانینو سرغړونه بللې او ټينګار يې کړی چې له يادو قوانينو د سرغړونې مخنيوي لپاره بايد نور افغانان له جرمني او اروپايي هېوادونو ونه ایستل شي.
د بښنې نړیوال سازمان د خبرپاڼې یوه برخه: « غیر قانوني اعدامونو، جبري ورکېدلو، شکنجو او د نجونو او ښځو سیسټماټیک محکومیت ته په کتو باید هېڅوک په زور افغانستان ته وا نه ستول شي. د جرمني دغه پرېکړه د پناه غوښتونکو د اخراج مخنیوي له قانون سره په ټکر کې ده.»
که څه هم سرپرست حکومت د افغان کډوالو په تړاو د جرمني وروستی اقدام او د اتریش ملاتړ په اړه څه نه وايي، خو د جرمني رسنیو ویلي، دغه کار د قطر په منځنګړیتوب د سرپرست حکومت له چارواکو سره پر همغږۍ شوی.
د سیاسي چارو شنوونکي دغه ګام د جرمني حق ګڼي او وايي، یاد هېواد اړ شوی، ترڅو هغه افغان پناه غوښتونکي له خپلې خاورې وباسي، چې په غیر قانوني کړنو لاس پورې کوي.
د سیاسي چارو کارپوه خلیل احمد نادم وايي: « له بده مرغه دغه کسان په غیر قانوني او غیر اخلاقي کړنو لاس پورې کوي او کوربه هېوادونه مجبوروي چې له خپلې خاورې یې وباسي. زما په اند، باید خپله افغانستان کې د خلکو لپاره د کار او زده کړو شرایط چمتو شي.»
بله خوا، د زندانونو چارو د سمون ادارې مالومات ښيي چې اوسمهال د ایران او پاکستان په ګډون ۱۲ هېوادونو کې شاوخوا نهه زره افغانان بندیان دي، چې له ډلې یې ۱ زره او ۱۰۰ تنه را خوشې شوي او د نورو د خوشې کولو هڅې روانې دي.
د زندانونو چارو سمون ادارې سرپرست مولوي محمد یوسف مستري: «په نورو هېوادونو کې موږ له ۸ تر ۹ زرو بندیان لرو. تر ټولو ډېر بندیان په ایران هېواد کې دي؛ په تېرو کلونو کې هلته شاوخوا ۶ زره تنه افغانان بندیان وو چې تېر کال ۱ زر۱۵۸ تنه هېواد ته را لېږدول شوي، شاوخوا ۱۰۰۰ تنه نور دوی خپله خوشي کړي.»
اسلامي امارت له یو شمېر اروپايي هېوادونو د افغان کډوالو د جبري ستنولو په تړاو څه نه وايي، خو له پاکستانه د افغان کډوالو د شړلو پرمهال یې ویلي وو، چې ټول کوربه هېوادونه دې د افغان کډوالو حقونه تامين او اړوند اسانتياوې ورته برابرې کړي.
