په کابل کې د سولې او اوربند پر ملاتړ ولسي ناسته جوړې شوې، چې د هېواد له بېلابېلو ولایتونو کې په کې خلکو ګډون کړی او پر وسله والو طالبانو او افغان حکومت دواړو یې غږ وکړ چې د جګړې پر ځای دې د سولې پر خبرو تمرکز زیات او تاوتریخوالی دې کم کړي.
د ناستې ګډونوالو طالبانو ته خبرداری ورکړ چې د جګړې له لارې واک ته نه شي رسېدلی او د جګړې دوام بهرنیو مداخلو ته زمینه برابروي.
د شخړو حل په برخه کې د ولسمشر سلاکار ابراهیم الکوزی وايي: « پر طالبانو غږ کوم چې جګړه د حل لار نه ده او د افغانستان خلک نور مه مجبوره کوئ، که د جګړې دریځ غوره کړئ، شل کاله نوره به هم جګړه دوام وکړي او بهرنيان به ماموریتونه ترسره کړي.»
په ورته وخت کې د ناستې ګډونوالو پر نړیوالې ټولنې هم غږ وکړ چې دواړه لوري دې د سولې خبرو ته وهڅوي.
ګډونوالو روان حالت هم د اندېښنې وړ وباله او زیاته یې کړه چې افغانان له جګړې ستړي دي، بهرنیان ورته سوله نه راولي، ترڅو پر خپله افغانان خپل برخلیک پر خپله ونه ټاکي.
د ناستې یو تن ګډونوال محمد جان روحاني وايي:« د افغانستان خلک سوله غواړي، نړۍ د افغانستان لپاره سوله غواړي. دوه نسلونه مو تباه شول،خو دا سوله درک نه لري.»
د ناستې ګډونوال عبدالناصر وجوهاد وايي:« خپل غږ پورته کوو چې جګړه د حل لارهنه ده. باید د مذاکرې میز ته کینې او د سولې خبري ورستي کړي او نور وینه تویونه بس کړي. »
د ساداتو قومي شورا مشر سید پاچا حسیني وايي: « د افغانستان خلک باید یو محور باندې راټول شي او ټول افغانان په ګډه د خاورې لپاره کار وکړي.»
د سولې او اوربند پر ملاتړ داسې مهال ولسي ناستې پر زیاتېدو دي، چې د هېواد په ګڼو ولایتونو کې تر بل هر وخت جګړو زور اخېستی او په دوحه کې د سولې خبرو کې د پام وړ پرمختګ نه شته.
