په پکتیا ولایت کې یو شمېر دیني عالمانو ناسته کړې او سعودي عربستان کې یې د افغان جګړې په اړه د وروستۍ ناستې له پرېکړې ملاتړ وکړ.
دغه راز عالمانو روانه جګړه ناروا وبلله او له د جګړې له ښکیلو غاړو یې وغوښتل، چې اوربند وکړي او له ځنډ پرته دې بین الافغاني مذاکرات پیل کړي.
د پکتیا حج اوقاف مشر اظهار الله مظهري وايي: « د زور له لارې د افغانستان پر خاوره هېڅوک نه حکومتوالي او نه هم حکمراني کولائ شي.»
دیني عالمانو همدا راز پر یو شمېر پاکستاني دیني عالمانو نیوکه وکړه، چې هلته له جمهوریت او پوځ ملاتړ کوي او د افغان جګړې په اړه د جهاد فتاواوې ورکوي او خلک جګړې ته هڅوي.
په ورته وخت کې دیني عالمان پر خلکو غږ وکړ،چې په ټول توان دې د نظام ملاتړ وکړي.
دیني عالم عبدالغفور وايي:« موږ او تاسو به انشاء الله پر ټول وس او توان، که علماء دي، که سپین ګیري دي، که ځوانان دي، ټول په یوالي سره د خپل نظام پر ملاتړ څنګ په څنګ ولاړ یو. »
بل پلو د پکتیا والي ګل نبي احمدزي له دیني عالمانو وغوښتل، چې د ولایت پر کچه دې د سولې خبرو لپاره هڅې وکړي او سیمه ییز طالبان دې له جګړې را وګرځوي .
طالبانو د روانې جګړې په اړه د پکتیا د دیني عالمانو تازه څرګندونو ته غبرګون نه دی ښودلی،خو تر دې وړاندې یې ورته څرګندونې رد کړي دي.
