د اسلامي امارت د امربالمعروف، نهې عن المنکر او شکایتونو اورېدلو وزارت نوي توشېح شوي قانون ته لا هم په نړیواله کچه غبرګونونه را روان دي.
په تازه غبرګون کې ملګرو ملتونو له اسلامي امارت غوښتي، چې دغه قانون دې ژر تر ژره لغو اعلان کړي.
د یاد سازمان د بشري حقونو ستره شورا وایي، د اسلامي امارت نوي قانون پر ښځو، ځوانانو او رسنیو ګڼ محدودیتونه لګولي او دغه کار په نړیواله کچه اندېښنې زیاتې کړې دي.
د ملګرو ملتونو د بشري حقونو سترې شورا ویاندې روینا شمداساني ویلي: « موږ له طالبانو غواړو، چې امر باالمعروف او نهې عنالمنکر قانون ژر تر ژره لغوه کړي. په دې قانون کې طالبانو پر ښځو، ځوانانو او رسنیو ګڼ شمېر داسې محدودیتونه لګولي، چې له مخې يې د هغوی لومړني حقونه تر پښو لاندې شوي دي.»
په ورته مهال د سیاسي چارو شنونکي وایي، که اسلامي امارت پر ځینو مسایلو له سره غور ونه کړي، ښایي له نړیوالې ټولنې سره یې اړیکې نورې هم خړې شي.
دوی له اسلامي امارت غواړي، چې له نړیوالې ټولنې سره د سیاسي تعامل لپاره نرم چلن غوره کړي.
د سیاسي چارو شنوونکی خلیل احمد نادم وايي: « دا قانون افغانستان نور هم انزوا ته وړي او له امله یې ټوله نړۍ د افغانستان پر وړاندې درېږي. څوک چې دا لوبې کوي باید مخه یې ونیول شي. موږ هم مسلمانان یو او له ماشومتوب څخه د معروف او منکر درس راکړل شوی.»
بله خوا د اسلامي امارت چارواکي د نړیوالو غوښتنو او غبرګونونو ته په ځواب کې وایي، دا هېڅ امکان نه لري، چې د اسلامي امارت له خوا توشېح شوی قانون لغو یا وځنډول شي.
دوی زیاتوي، افغانانو د شریعت قانون لپاره نږدې ۴۰ کاله قرباني ورکړې او نړیوال یې باید احترام وکړي.
د امربالمعروف او نهې عن المنکر وزارت د شکایتونو اورېدلو رییس راز محمد حامد وايي: « دا له قرآن او حدیث څخه را ایستل شوی شرعي قانون دی؛ د لغوه کېدو او د افغانستان د خلکو له خوا د منفي غبرګون هېڅ تصور نه شي کېدای. افغانانو د دې قانون د تنفیذ لپاره قرباني ورکړې. له نړیوالو او ملګرو ملتونو غوښتنه کوو، چې د مسلمانانو قوانینو ته احترام ولري او د لغو ه کېدو غوښتنه یې ونه کړي.»
دا په داسې حال کې ده، چې اروپایي ټولنې هم خبرداری ورکړی، چې د امرباالمعروف او نهې عنالمنکر وزارت نوی قانون به د نړیوالو له خوا د افغانستان د سرپرست حکومت رسمیت پېژندنه نوره هم سخته او له ځنډ سره مخ کړي.
اروپايي ټولنه په دې باور ده، چې دغه نوی قانون به افغانان له ډېرو لومړنیو حقونو بې برخې او د افغان ښځو غږ به لا غلی کړي.
