د دولتي ادارو د یو کلنو لاسته راوړنو په لړ کې پرون سې شنبې پر ورځ د (۱۴۰۳ کال د وږي پر ۶مه) د کورنیو چارو وزارت خپلې یوکلنې راسته راوړنې له رسنیو سره شریکې کړې.
د کورنیو چارو وزارت چارواکي وايي، په افغانستان کې له بل هر وخت امنیتي وضیعت ښه دی او هېڅ داسې ډله نه شته، چې د هېواد امنیت ګډوډ کړي.
د دغه وزارت ویاند مفتي عبدالمتین قانع وايي، په افغانستان داعش ډله په بشپړه توګه ځپل شوی او د برېدونو توان نه لري.
قانع زیاتوي:« داعش ختم شوی او سراسري امنیت ټینګ دی. زه ټول ولس ته ډاډ ورکوم، چې دغه پدیده نوره نه شته او نه د برید کولو توان لري.»
دغه وزارت په ټولنه کې د پولیسو د رول لا اغیزمنتیا او مسلکيتوب په موخه د ځانګړي څلور کلن ستراتیژیک پلان له جوړېدو خبر ورکوي او وايي، د همدې سند پر بنسټ چارې روانې دي.
د کورنیو چارو وزارت مرستیال مولوي محمد نبي عمري وايي: « د هېواد اوسني امنیتي وضعیت ته په کتو، د کورنیو چارو وزارت په ټولنه کې د پولیسو اغېزمن رول او امنیت په اړه د یوه متخصص ټیم پر مټ څلور کلن سټراتیژيک پلان چمتو کړی او دغه پلان له تېر یوه کال راهیسې د کورنیو چارو وزارت د ټولو فعالیتونو بنسټیز لارښود ګڼل کېږي.»
قانع وايي، په ټول هېواد کې د جنايي جرمونو کچه ۳۰ سلنه راکمه شوې او د مجرمانو د نیولو په تړاو د پولیسو د کشف کچه له ۹۰ سلنو پورته شوې ده.
قانع زیاتوي:« ملي پولیسو د جنايي جرمونو په تړاو د تېر کال په پرتله ښه فعالیت درلود او له امله یې د هېواد پر کچه د جرمونو کچه ۳۰ سلنه ټیټه شوې. د پولیسو ځواکونه بریالي شوي، چې د جرمونو په کشف کې ۹۰ سلنه پرمختګ ولري.»
دغه وزارت د عوایدو له زیاتېدو هم خبر ورکوي او وايي، په تېر یوه کال کې له ۱۳ میلیارده افغانیو زیات عواید راټول شوي او د دولت خزانې ته سپارل شوي دي.
د چارواکو په خبره، دغه عواید د پاسپورټونو او پېژندپاڼو د وېش ترڅنګ وسلو ته د قانوني جواز ورکولو او نورو اسنادو د وېشلو له لارې راټول کړي دي.
د کورنیو چارو وزارت ویاند زیاتوي: « کورنیو چارو وزارت په تېر یوه کال کې ۱۳ میلیارده ۴۷۱ میلیونه افغانۍ عواید له خپلو خدماتي څانګو لکه د عامه ساتنې تصدۍ، پاسپورټ او ټرافیکو ریاستونو، د وسلو او زرهي موټرو د جواز له لارې راټول کړي او د دولت خزانې ته سپارلي دي.»
د دغه وزارت په راپور کې راغلي، چې په تېر یوه کال کې له ۵۵ زرو زیات سوالګر راټول شوي، چې له ډلې یې څه باندې ۲۵زره مستحق او نږدې ۳۰ زره یې مسلکي سوالګر تثبیت شوي دي.
عبدالمتین قانع په دې اړه وايي: « د سوالګرو ټولولو پروسې له پيل راهیسې ۵۵ زره ۳۶۳ تنه سوالګر له ټول هېواد راټول شوي، چې له ډلې یې ۲۵ زره ۸۷۸ تنه مستحق او ۲۹ زره ۴۴۷ نور حرفه يي سوالګر تثبیت شوي دي.»
په ټوله کې، کورنیو چارو وزارت وايي شاوخوا ۲۵۰ زره پولیس لري، چې اوسمهال د امنیت په ټینګولو او د قانون پر پلي کولو بوخت دي.
