په داسې حال کې چې د هېواد په شاوخوا پنځلس ولایتونو کې دافغانځواکونو او وسلهوالو طالبانو ترمنځ سختې نښتې روانې دي، د کابل یو شمېر اوسېدونکي د سولې غوښتنې او جګړې بس لپاره راټول شوي او پر وسلهوالو طالبانو یې غږ وکړ چې سوله وکړي.
دوی په چاپ کړیو سټېکرونو کې (د خدای لپاره جګړه بس کړئ) غوښتنه کړې وه او په موټرونو او دیوالونو یې یاد سټېکرونه ونښلول. راټول شويو کسانو پر نړیوالې ټولنې او د جګړې پر دواړو لوریو نیوکې وکړې چې د سولې لپاره یې صادقانه ګامونه نه دي اخیستي او تش شعارونه ورکوي.
د افغانستان د عالماوو سرتاسري شورا مشر عبدالقادر غوري وایي: « له ښکېلو غاړو او نړیوال سازمانونو غواړو تر څو نور دې د افغانانو وینه نه تویوي او زموږ د خلکو غږ واوري او نور افغانان په قتل او قتال کې ونه ساتي.»
دوی وایي، د سولې غوښتنې دغه غږ به د هېواد ټولو ولایتونو ته ورسوي.
د غونډې ګډونوالو پر روانې جګړې اندېښنه څرګنده کړه او نیوکه یې وکړه چې ټول قربانیان یې عام وګړي دي او باید ښکېلې خواووې جګړه بس کړي.
د غونډې ویناوالو د ځوان نسل د راتلونکي په اړه هم اندېښنه وښوده.
کابل ښاریان پر داسې مهال د سولې او اوربند غوښتنه کوي چې په شاوخوا پنځلس ولایتونو کې سختې جګړې روانې دي، زرګونه کورنۍ له خپلو کورونو بېځایه شوي او خلکو ته ګڼ مالي زیانونه اوښتي دي.