د عامې روغتیا وزارت وايي، د پخوا پر پرتله د کورونا وبا ضد واکسین ویش مرکزونو ته د خلکو مراجعه زیاته شوې او تر دې مهاله نږدې یو میلیون کسانو ته واکسین تطبیق شوی دی.
د کورونا وبا درېیمې څپې له رارسېدو سره هم مهاله د واکسین وېش هغه څه وو،چې افغانانو کې یې له کورونا وبا سره د مبارزې روحیه راژوندۍ کړه.
سره له دې چې لاهم د دې واکسینو د تطبیق په تړاو بیلابیل باورونه او انګېرنې موجودې دي،خو عامې روغتیا وزارت یې پر اغیزمنتیا ټېنګار کوي.
د یاد وزارت مرستیال ویاند مېرویس علیزی وایي، د هېواد پر کچه د کورونا وبا ضد واکسینو تطبیق مرکزونه فعال دي،خو نا امنو سیمو کې یې کله کله فعالیتونه د جګړې له امله ټکني کېږي.
علیزي زیاته کړه: « تر دې دمه په ولایتونو او ولسوالیو کې هېڅ مشکل موجود نه دی، یوازې ځینو ولایتونو او ولسوالیو کې چې جګړه ده، له امله یې هلته زموږ روغتیايي چوپړتیاوې یو څه ټکني کېږي،خو بیا هم هڅه کوو، چې واکسین د هېواد ټولو برخو ته ورسوو.»
هېواد ته د چین ساینو فارم او جانسن جانسن امریکايي واکسینو له لېږد وړاندې پنځه سوه زره ډوزه هندی واکسین رارسېدلي وو،چې یو شمېر کسانو ته یې دواړه ډوزه تزریق نه شول،خو واکسین ختم شول،چې دې چارې د معافیت په برخه کې د خلکو اندېښنې راپارولي دي.
روغتیا وزارت بیا وايي، هڅه کوي، د روانې جولای میاشتې تر پایه نور هندي واکسین هم هېواد ته راوړي.
د کابل ښار اوسېدونکی نورا جان بهیر وايي:« له حکومته مو غوښتنه دا ده،چې هغو کسانو لپاره له هند څخه د واکسینو مرسته وغواړي، چا چې یو ډوز هندی واکسین کړی،که داسې و نه شي، ښايي د دویم ډوز وخت تېر شي او له روغتیايې ستونزو سره مخ شو.»
عامې روغتیا وزارت د تېرو ۲۴ ساعتونو ارقام ښيي،چې په دې موده کې ۱۵۷۰ کسان پر کورونا وبا اخته شوي او ۶۷ نور ترې مړه شوي دي.
روغتیا وزارت وايي، د نویو پېښو په ثبت سره هېواد کې پر کورونا وبا د ټولو اخته کسانو شمېر ۱۳۴ زره او ۶۵۳ ته او د مړو شمېر ۵ زره او ۷۹۱ ته ورسېد.
عامې روغتیا وزارت هڅه کوي، د کورونا وبا ضد واکسینو د تطبیق په مرسته د کورونا وبا ګواښ راکم کړي.
