د حکومتي ادارو د یو کلنو لاسته راوړنو په لړ کې دا ځل د ټرانسپورټ او هوايي چلن وزارت خپل یوکلن راپور له رسنیو سره شریک کړ.
د دغه وزارت چارواکي وايي، په تېر یوه کال کې د افغانستان له فضا له ۲۴ زرو زیاتې عبوري الوتنې شوې او دغه شمېره وروستیو دوه میاشتو کې څو برابره لوړه شوې.
د چارواکو په خبره، نړیوالو الوتنو لپاره د افغانستان فضا خوندي ده او ټول نړیوال هوايي شرکتونه کولی شي د افغانستان په فضا کې الوتنې وکړي.
دغه راز دوی له هوايي ټرانسپورټ څخه د افغانستان د عوایدو زیاتېدو خبره کوي او وايي، دا مهال په هرو ۲۴ ساعتونو کې د افغانستان له فضا ۲۶۵ الوتنې تېریږي او له هرې الوتنېافغانستان ته ۷۰۰ امریکايي ډالره عاید راځي.
د ټرانسپورټ او هوايي چلن وزارت ویاند امام الدین احمدي وايي: « په دې وروستیو کې د افغانستان له فضا څخه د عبوري الوتنو شمېر زیات شوی. دا مهال په هرو ۲۴ ساعتونو کې ۲۶۵ الوتنې تېرېږي او دغه کچه د زیاتېدو په حال کې ده. هره عبوري الوتنه افغانستان ته ۷۰۰ امریکايي ډالره حق العبور ورکوي. زموږ هوايي حریم د نړیوالو الوتنو لپاره خوندي او بې خطره دی او په تېرو درېیو کالو کې هېڅ یوې ملکي الوتنې ته ستونزه نه ده پېښه شوې. موږ ټولو ملکي هوايي شرکتونو ته ډاډ ورکوو، چې زموږ ټول هوايي ډګرونه په تجهیزاتو سمبال دي او له نړیوالو معیارونو سره سم خدمتونه وړاندې کوي.»
د ټرانسپورټ او هوايي چلن وزارت اداري او مالي مرستیال انجنیر صدیقالله عابد وايي: « موږ هڅه کوو، د افغانستان هوايي حریم د نړیوالو الوتنو لپاره پوره خوندي کړو. دا مهال زموږ له فضا څخه په تېرېدونکو الوتنو کې زیاتوالی راغلی.»
د ټرانسپورټ او هوايي چلند وزرات عملیاتي مرستیال فتح الله منصور بیا وايي:« په تېر یوه کال کې د افغانستان له فضا څخه ۴۰ زره ۱۶ عبوري الوتنې شوې.»
د یاد وزارت چارواکي په کابل نړیوال هوايي ډګر کې د مسافرو لپاره د یوې نوې انتظارخونې د جوړېدو خبره هم کوي او وايي، دغه خونه به د ۳۰۰ میلیونه افغانیو په لګښت په درې پوړونو کې جوړه او له ټولو اړینو اسانتیاوو به برخمنه وي.
د دوی په خبره، ټاکل شوې ده، چې د دغې ودانۍ چارې په یوه نیم کال کې بشپړې شي.
د ټرانسپورت او هوايي چلند وزارت عملیاتي مرستیال مولوي فتح الله منصور وايي:« په کابل نړیوال هوايي ډګر کې د ۳۰۰ میلیونه افغانیو په لګښت د یوې ودانۍ د بنسټ ډبره کېښودل شوه. دغه ودانۍ به د مسافرو لپاره انتظار ځای، رسټورانت، مېلمستون، روغتیايي کلینیک، د غونډو تالار او نورې اسانتیاوې ولري.»
په تېر یوه کال کې د افغانستان له هوايي ډګرونو له ۱۲زرو زیاتې الوتنې ترسره شوې، چې له ډلې یې ۷ زره ۹۰ کورنۍ او۵ زره ۴۲۳ یې بهرنۍ الوتنې وې.
د چارواکو په خبره، له دغو الوتنو د خدمتونو په بدل کې تر ۷ زرو امریکايي ډالرو مالیه اخیستل شوې او شاوخوا دوه میلیونه مسافر یې انتقال او را لېږدولي دي.
د ټرانسپورټ او هوايي چلن وزارت ویاند امام الدین احمدي وايي:«هغو الوتنو ته بېلابېل خدمتونه وړاندې کېږي او عواید ترې ترلاسه کېږي،چې په افغانستان کې الوتنې کوي. تقریبا ً له هرې الوتنې څخه له ۵ تر ۷ زرو امریکايي ډالر مالیه اخیستل کېږي.»
د دغه وزارت ځمکني ټرانسپورټ معین عبدالسلام حیدري وايي، د ځمکني ټرانسپورټ په برخه کې هم ګڼې لاسته راوړنې لري او د تګ راتګ د لنډ مهاله ځانګړي سند له لارې یې ګاونډي پاکستان ته د زرګونو بار وړونکو لاریو د تګ راتګ زمینه برابره کړې او همداراز د ایرن او ازبېکستان په ګډون ګڼو نورو هیوادونو ته یې د زرګونو بار وړونکو موټرو ته د تګ راتګ اسانتیاوې برابرې کړې دي.
حیدري زیاتوي:« په تېر یوه کال کې له افغانستانه ګاونډیو او د سیمې هېوادونو ته له ۵۲۴ زره زیاتو افغاني لاریو او افغانستان ته له ۴۳۴ زره زیاتو بهرنیو لاریو تګ راتګ کړی.»
دغه وزارت وايي د ځمکني ټرانسپورټ لپاره یې د مجهزو ترمینلونو د جوړولو لپاره په ټولو هېواد کې له درې نیم زره جریبه زیاته ځمکه په پام کې نیولې.
د ټرانسپورټ وزارت چارواکي وايي، دا مهال په ټول هېواد کې ۲۷ فعال هوايي ډګرونه موجود دي، چې ۵ یې نړیوال هوايي ډګرونه دي.
د چارواکو په خبره، په دغو هوايي ډګرونو کې معیاري خدمات وړاندې کیږي.
