د عامې روغتیا وزارت مرستیال ویاند مېروس علیزی وایې، د امریکا له لوري د کورونا وبا ضد مرسته شوی،جانسن جانسن واکسین به د ټول هېواد پر کچه ووېشل شي.
علیزی وايي، دغه واکسین هغو سیمو ته هم لېږي،چې حکومت پرې حاکمیت نه لري او د وسله والو په واک کې دي.
علیزي زیاته کړه:« ټولو ولایتونو ته د انتقال پروسه دوام لري، هغه سیمې چې له ۳۰۰ څخه ډیر روغتیایي مرکزونه په کې شته که امن دي او که نا امنه دي، هلته واکسیناتوارن موجود دي او هلته رسیږي او د واکسیونو تطبیق په برخه کې به هېڅ ستونزه موجوده نه وي.»
روغتیا وزارت وایي، د نورو واکسیونو په توپیر د امریکا جانسن جانسن واکسین په یو ځل تطبیق کېږي.
علیزی وايي:«ټول هغه واکسینونه چې د کورونا معافیت لپاره تطبیق کېږي، ګټور واکسینونه چې معافیت حاصلوي. د جانسن ، جانسن واکسین هم چې دی، د دې معافیت په یو ډوز سره عظمي حد ته رسیږي.»
د امريکا له خوا افغانستان سره د درې میلیونه دوزه جانسن جانسن واکسين له مرستې ۱.۴۸ ميليون ډوزه یې وړمه ورځ کابل ته رارسېدلي.
د جانسن جانسن واکسین شرکت وایي، دا واکسین په سلو کې ۸۵ سلنه د ناروغۍ پر وړاندې معافیت لوړوي.
د روغتیا نړیوال سازمان ویلي، د دې واکسین یو ډوز له ۱۸ کلونو پورته عمر لرونکو کسانو ته کېږي.
یاد سازمان د ۲۰۲۱ کال مارچ میاشتې په ۱۲مه نېټه د جانسن ،جانسن واکسین د بېړنۍ کارونې لپاره تائید کړی.
له دې وړاندې هم افغانستان کې خلکو ته دوه ډوله د کورونا وبا ضد واکسین تطبیق شوی دی.
هند افغانستان ته د ۵۰۰ زره او چین د ساینوفارم واکسین ۷۰۰ زره ډوزه واکسین مرسته کړې وه.
روغتیا وزارت وايي، تر اوسه پورې په هېواد کې ۹۵۱ زره کسانو ته د کورونا وبا واکسین تطبیق کړی دی.
د روغتیا وزارت د رسمي شمېرو له مخې، په ټول هېواد کې پر کورونا وبا د اخته کسانو شمېر له ۱۳۳ زرو لوړ شوی، ۵ زره ۷۲۴ کسان مړه شوي او ۸۰ زره ۲۰۴ کسان ترې بېرته روغ شوي دي.