د ننګرهار ولایت مرکز د جلال آباد زاړه ښار ګودام سنګي سیمې ته هره ورځ پر نشه يي توکو روږدي سلګونه ځوانان ورځي او بېلابېل نیشه یي توکي کاروي.
د جلال آباد ښار اوسېدونکي وايي، پر نشه يي توکو د روږدو کسانو د شمېر له زياتېدو سره دغلته غلاوې هم زياتې شوي او دوی يې له ستونزو سره مخ کړي دي.
دوی غوښتنه کوي، چې مسوولین دې نه یوازې د نشه یي توکو د کارروباریانو، کرکیلې او قاچاق مخنیوی وکړي، بلکې پر نشه يي توکو د روږدو کسانو د درملنې او له هغې وروسته ورته د کاري فرصتونو برابرولو لپاره هم ګامونه پورته کړي.
د جلال آباد ښار یو تن اوسېدونکی ګلاب خان وايي: « تاسو ګورئ، ډېر ښایسته او تنکي ځوانان په نشه يي توکو اخته شوي او شمېر یې ورځ تر بلې زیاتېږي.»
همدارنګه د جلال آباد ښار یو بل اوسېدونکی هدایت الله بیا وايي:« د شهر کهنه په لوړه ساحه کې سلګونه پوډریان شته دي او دوی په غلاوو او شوکو کې لاس لري. موږ له دولته غوښتنه کوو، چې د دغو کسانو درملنه وکړي او له هغې وروسته د کار زمینه ورته برابره کړي.»
مسوولین بیا وايي، دوی اوس مهال د نشه یې توکو د کرکیلې او قاچاق له مخنیوي سربېره، د دغو توکو د کاروباریانو د نیولو په برخه کې هم هڅې چټکې کړې او په پام کې لري، چې جلال آباد ښار کې پر نشه يي توکو د روږدو کسانو راټولولو او درملنې لپاره ۱۰۰۰ بستریز روغتون هم جوړ کړي.
د ننګرهار امنیې قوماندانۍ ویاند عبد البصیر زابلي وایي: « موږ د نشه يي توکو کاروبار او کرکیلې ته اجازه نه ورکوو. د نشه يي توکو پر وړاندې د مبارزې مدیریت تر اوسه ۱۷۰ تنه پر نشه يي توکو روږدي کسان د درملنې لپاره راټول کړي. دا چې د دغو کسانو شمېر زیات دی، په پام کې ده، چې د درملنې لپاره یې یو باب زر بستریز روغتون هم جوړ شي.»
اوس مهال په ننګرهار کې د روږدو د درملنې لپاره ۱۷۰ بستره روغتون ځانګړی شوی، چې د دوو میاشتو په موده کې د اړوند کسانو درملنه په کې کېږي.
چارواکي وايي، د زر بستریز روغتون له جوړېدو سره به پر نیشه يي توکو د روږدو کسانو د درملنې موده شپږو میاشتو ته لوړه شي.
