له پاکستان او ایران په جبر را ایستل شویو افغان کډوالو ته د بلخ په شولګرې ولسوالۍ کې د یوه ترکيي خیريه بنسټ له لوري د ۸۰ زره امریکایي ډالرو په ارزښت ۴۰ بابه کورونه جوړېږي.
د بلخ ځايي چارواکي له راستانه شویو افغانانو سره د هر راز همکاریو ډاډ ورکوي او وایي، د سرپناه جوړولو لړۍ به د دې ولایت نورو ولسوالیو ته هم وغځوي.
د بلخ د کډوالو او راستنېدونکو چارو رئیس اسدالله وفا وايي: «دا د تازه راستنو شویو کورنیو لپاره د سرپناه جوړولو یوه لویه پروژه ده. له خلکو غوښتنه کوم، چې د هغو کسانو په موندلو کې له موږ سره همکاري وکړي، چې تازه راستانه شوي او سرپناه نه لري.»
په همدې حال کې د ترکیې خیریه بنسټ استازی حمید ګونت وایي، له دغه ګام یې موخه د افغانستان او ترکيې د اړیکو پیاوړتیا او د مظلومو افغانانو لاسنیوی دی.
ګونت زیاتوي:« که څه هم د افغانستان او ترکيې ترمنځ زرګونه کیلومټره واټن دی، خو زړونه مو سره نږدې دي. د ترکيې حکومت او خلک تل له افغانانو سره په هر ډول شرایطو کې مل دي. موږ چې کله د بلخ شولګرې ولسوالۍ ته د سروې په موخه راغلو او د راستنو شویو افغانو وضعیت مو ولید، نو پرېکړه مو وکړه، چې دا خلک واقعا ً اړمن دي او ملاتړ ته اړتیا لري.»
په همدې حال یو شمېر راستانه شوي چې تازه ورته سرپناوې جوړېږي، د سرپرست حکومت او خیریه بنسټ له پورته کړي ګام هرکلی کوي او نورو ته هم د ورته سرپناوو پر جوړولو ټینګار کوي.
له پاکستانه تازه راستون شوی یو تن افغان کډوال محمدظاهر وايي: « موږ یې له پاکستانه راوشړلو او هرڅه مو هلته پاتې شول. دلته وطن کې هم سرپناه نه لرو. له حکومت مننه کوو،چې موږ ته سرپناه جوړوي.»
له پاکستانه یو بل راستون شوی افغان کډوال محمد یونس بیا وايي: « زموږ لومړۍ غوښتنه سرپناه ده. بله غوښتنه مو دا ده چې زموږ اولادونو ته ښوونځی او مدرسه جوړه شي او د څښاک اوبو غم وخوړل شي.»
د بلخ سيمهییز مسوولین پر خیریه بنسټونو غږ کوي، چې په ځانګړې توګه له پاکستان او ایران څخه راشړل شویو افغانانو ملاتړ وکړي.
د یادونې وړ ده، چې دغه سرپناوې به د دوو میاشتو په موده کې بشپړې او ګټې اخیستنې ته به وسپارل شي.
