د پکتېا سوداګرۍ خونې مشر نصیر علم یار وايي، د طالبانو له لوري ډنډ پټان ولسوالۍ کې د ګمرک له نیول کېدو وروسته صادرات صفر او واردات بیا ۳۰ سلنه زیات شوي دي.
علم یار زیاته کړه:« متاسفانه اوسني حالت زموږ صادرات هم پر ټپه درولي دي. زموږ میوه جات پخوا د پټان له لارې پاکستان تلل، خو متاسفانه اوس د رکود په حالت کې دي.»
بل پلو یو شمېر سوداګر بیا وایي، وروستیو ناامنیو یې په ټولییز ډول پر کاروبار ناوړه اغېزه کړې او هره ورځ له نامالومو ادرسونو خبرداري تر لاسه کوي،چې د پیسو غوښتنه ترې کیږي.
سوداګر معروف وايي:« امنیتي حالت ډېر تاثیر کړی دی. تجار تر ګواښ لاندی دی. زنګ ورته وهل کېږي، د طالب په نوم، د داعش په نوم او پیسې ترې غواړي. څوک چې ډېر احساس ونه لري، په دې شرایطو کې دلته کار نه کوي.»
د پکتیا اوسېدونکي د وروستیو ناامنیو مسوول ولایتي چارواکي ګڼي،چې پر وینا یې د ناغېړۍ له کبله یې ګڼې ولسوالۍ له لاسه وتلي او له مرکزي حکومت یې د ګوښه کېدو او عدلیي تعقیب غوښتنه کوي.
د پکتیا اوسېدونکی جمال الدین اصف خېل وايي: « په ټوله کې د ولایتي ادارې د بې غورۍ له امله چې ډنډ پټان ولسوالۍ ته یې پام ونه کړ، طالبانو ونیوله. تاسو نن د دې شاهد یئ،چې د ورځې څومره افغانۍ ضایع کېږي.»
د طالبانو له لوري د پټان ګمرک له نیول کیدو وروسته هره ورځ پکتیا ګمرک ته میلیونه افغانۍ زیان اوړي، ومو غوښتل، چې په دې اړه د پکتیا ګمرک مدیریت او ولایت مقام نظر هم ولرو، خو خبرو ته حاضر نه شول
پکتیا کې له تېرو دوو اونیو راهیسې د ډنډ پټان ولسوالۍ په ګډون چې ګمرک په کې فعال دی، ختیځې اووه ولسوالۍ یې د طالبانو له لوري نیول شوي دي.