د چین ولسمشر شي جین پينګ د پلازمېنې بېجینګ ټيانمېن څلور لارې کې د کمونست ګوند د سلمې کالېزې نمانځنې په اړه جوړو شویو مراسمو کې د وینا پر مهال وویل، هېواد یې د پېړۍ موخه ترلاسه کړې او په خبره یې ټولو اړخونو کې د منځنۍ کچې ټولنې پر جوړولو بریالي شوي.
ولسمشر شي وايي:« نن د جولای لومړۍ نېټه ده. دا د چین کمونست ګوند او د چین د ملت په تاریخ کې ځانګړې او ستره ورځ ده. موږ دلته راټول شوي یو،چې د ګوند ټول غړي او د چین د هرې ډلې خلک د ګوند سلمه کلېزه ونمانځي. شا ته وګوري،چې د ګوند تېر سل کاله په هڅو کې تېر شوي دي او راتلونکي ته وګوري،چې د چین نوي کول په کې نغښتي دي.»
په ورته وخت کې ولسمشر شي وايي، د راتلونکې پېړۍ موخه یې د یوې سترې عصري سوسیالې ټولنې جوړول دي.
ولسمشر شي زیاته کړه:« په دې ځانګړي فرصت کې دا ډېر د ویاړ ځای ګڼم،چې د ګوند او د خلکو په استازیتوب اعلان کوم،چې د دوامداره هڅو پر مټ ټول ملت او ګوند کړي دي. موږ د دې پېړۍ موخه چې له هر اړخه د منځنۍ کچې سوکاله ټولنې را منځ ته کول وو، په رېښتیا بدله کړې ده. د دې خبرې مانا دا ده،چې موږ په چین کې د بېوزلۍ ستونزې له پاره تاریخي حل موندلی دی. موږ اوس مهال د چین د بلې پېړۍ د موخې پر لور ځو،چې هغه په ټولو برخو کې د یوې سترې عصري سوسیالېستي ټولنې جوړول دي. دا د چین ملت او کمونست ګوند له پاره ستره او عظیمه لاس ته راوړنه ده.»
د چین کمونست ګوند چې د نړۍ پر سطحه تر ټولو ستر واکمن ګوند هم بلل کېږي، له ۹۵ میلیونو ډېر غړي لري او سل کاله وړاندې یې د بنسټ ډبره اېښودل شوې.
دا ګوند د ۱۹۲۱زېږدیز کال په جولای میاشت کې تاسیس شوی وو،چې ۱۲ تنو په کې د پنځوسو غړو استازیتوب کاوه، لومړی کانګرس یې د هماغه کال د جولای په وروستیو کې پټ ترسره کړ او وروسته یې د جولای لومړۍ نېټه د تاسیس نېټه یاده شوه.