په ايران کې د افغانانو او ايرانيانو ترمنځ له فزيکي شخړې وروسته، دغلته د افغانانو پر وړاندې د عامو ايرانيانو او حکومت چلن سخت شوی.
په دې اړه خپاره شویو راپورونو کې ادعا شوې، چې د چنګاښ پر ۲۹مه د يادې شخړې په نتيجه کې يو ايرانی وژل شوی او له همدې کبله د تهران په ګډون د ايران په ګڼو ښارونو کې د افغانانو پر وړاندې حساسيت زيات شوی دی.
په خواله رسنيو کې له افغانانو سره د ايرانيانو ناوړه چلن ته په خپرو شوو منسوبو وېډيوګانو کې ښکاري، چې پر وهلو او ټکولو سربېره ان ځېنې افغانان د ايران په عامو واټونو کې ځړول شوي.
د بشري حقونو مدافعانو نړیواله ټولنې دغلته له افغانانو سره د روان ناوړه چلن په اړه اندېښنه ښودلې او زياته کړې يې ده، چې د ايرانيانو په وروستيو برېدونو کې افغانان زيانمن شوي دي.
یادې ټولنې زیاته کړې:« له نړیوالو غواړو، چي ژر تر ژر دې په ایران کې پر افغان کډوالو د بشري حقونو ضد محدودیتونو لرې کولو لپاره مداخله وکړي.»
دې مسالې ته په اشارې د ایران بهرنیو چارو وزارت چارواکو ويلي، د کډوالۍ مساله له کډوالو سره پر ضدیت، په پولو کې د دېوالونو پر جوړولو او غیرانساني اقداماتو نه شي حل کېدی.
د ايران بهرنيو چارو وزارت مرستيال سید رسول موسوي وايي:« کډوالي یوه نړیواله ستونزه ده. حکومتونه نه دي توانېدلي، چې د دېوالونو په جوړولو، د کډوالۍ پر ضد په سختو پالیسیو او له کډوالو سره د غیرانساني سلوک په وسیله دا ستونزه حل کړي.»
د سیاسي چارو شنونکي هم د افغان کډوالو پر وړاندې په ايران کې روان ناوړه چلن د اندېښنې وړ ګڼي او زياتوي، چې د چنګاښ له ۲۹مې وروسته د ټولو افغانانو پر وړاندې حساسيت زيات شوی او دوی نه شي کولی ډاډه تګ راتګ وکړي.
په ايران کې د افغان وګړو د خونديتوب په تړاو مو د بهرنيو چارو وزارت وپوښت، خو مسوولانو يې له مکررو اړيکو سره سره ځواب را نه کړ.
د کډوالو او راستنیدونکو چارو وزارت مسوولان بيا وايي، په دې تړاو د افغانستان او ايراني چارواکو ترمنځ خبرې شوي او مدعي دي، چې ستونزه په نسبي توګه هواره شوې.
په ايران کې مېشت افغانان وخت ناوخت له سختو حالاتو سره مخ کېږي او ان ايراني پوليسو يو شمېر هغه افغانان، چې په قاچاقي لارو له دې هېواده تېرېدل، پر ډزو هم وژلي دی.ش
