د کابل ولایت په ده سبز ولسوالۍ کې د عملیاتو پرمهال ۵ کسان وژل شوي او ۵ نور نیول شوي دي.
ځايي خلک وايي، وژل شوي ټول ملکیان دي، خو امنیتي سرچېنې وایي، دا شکمن وسله وال ول، چې په خبره یې مقاومت یې کړی.
خلکو د اعتراض په ډول هغه پنځه جسدونه د ده سبز ولسوالۍ مخې ته را وړي،چې د جمعې په شپه د یحیا کلي کې وژل شوي دي.
دوی وایې، په عملیاتو کې یو ملک، د هغه زوی او درې نورې کلیوال یې وژل شوي او پنځه نور یې نیول شوي دي.
په ولسي جرګه کې د کابل د همدې ولسوالۍ استازي الله ګل مجاهد خبرداری ورکړ،که ورته عملیات دوام وکړي، پر ضد به یې راپورته شي.
مجاهد زیاته کړه: « زموږ او ستاسو پرېکړه دا ده،چې د شبنې او یکشبنې ورځې پورې وخت ورکوو. عمومي رئیس سره ګورم، که خبره یې ونه منله، بیا راځو،همدلته یوه جلسه نیسو او د ده سبز ټول خلک راغواړو. له خپلې خاورې به د هر ظالم پر وړاندې دفاع وکړو. »
د وژل شویو کسانو کورنۍ غړي وایي، د شپې ناوخته امنیتي ځواکونو د دوی کورونو ته ورننوتل او د دوی په مخکې یې هغوی ووژل .
دوی وایي، وژل شويو کسانو هېڅ ډلې پورې تړاو نه درلود.
د وژل شوي کسانو یوتن خپل وايي:« تر ۱۲ بجو پورې یې درې واړه راوېستل. پلار او یو کوچنی زوی یې وواژه. مشر زوی یې چې ټرافیک دی، هغه یې له ځانه سره یوړ. تر اوسه پورې مالومه نه ده، چې هغه یې چېرته وړی دی. »
هڅه مو وکړه،چې په دې تړاو د ده سبز ولسوالۍ او کورنیو چارو وزارت نظر هم واخلو، خو په دې اړه یې له خبرو کولو ډډه وکړه.
که څه هم د یادې ولسوالۍ خلک ادعا کوي،چې وژل شوي کسان بي ګناه وو،خو یوې سرچینې ویلي،عملیات د شکمنو کسانو د نیولو په موخه شوي دي.
دغې سرچینې ویلي، د عملیاتو پرمهال مقاومت شوی،چې ۵ کسان وژل شوي او ۵ نور یې نیولي دي.
