د عامې روغتیا وزارت وايي، کورونا وبا هره ورځ د لسګونه کسانو ژوند اخلي، خو په خبره یې خلک يې اوس هم عادي ګڼي.
یاد وزارت په تېرې یوې شپې او ورځ کې د ثبت شویو ارقام په خپرولو سره روانه اونۍ مرګونې یاده کړه.
د روغتیا وزارت رسمي شمېرې ښيي،چې په تېرو پنځه ورځو کې ۷۲۶۰ کسان پر کورونا وبا اخته شوي او ۳۳۶ نور ترې مړه شوي دي.
د کورونا وبا تر ټولو لوړ ارقام په روانې اونۍ کې ثبت شوي دي.
په ټوله کې نیوکې پر عامو خلکو دي، چې روغتیايي سپارښتنې نه عملي کوي او همدا لامل دی،چې ورځ تر بلې د مثبتو پېښو شمېر په لوړېدو دی.
د کابل ښار اوسېدونکی وايي:« عام خلک د روغتیاپالانو سپارښتنې نه مني،په ګڼې ګونه ځایونو کې ګرځي. نن چې ما ولیدل،په سلو کې شل یا لس سلنه کسان هم ماسک نه کاروي او ډېر خلک بې ماسکه ګرځي.»
د کابل ښار اوسېدونکی وايي: « له دې چې موږ په تېر کې د روغتیا وزارت لارښونې نه دي مراعات کړي؛موږ ته یې تاکید وکړ، خو متاسفانه چې رعایت مو نه کړ. دا زموږ خپله ستونزه ده،ځکه زموږ خلک یو عادت لري،چې معمولا هغه څه چې موږ په ستوګو ونه ګورو یا پر موږ رانه شي موږ هغه نشو درک کولائ.»
د روغتیا وزارت د مالوماتو له مخې په یوه شپه او ورځ کې ۱۵۷۵ کسان پر کورونا وبا اخته شوي او ۸۶ نور ترې مړه شوي.
روغتیا وزارت وايي، په همدې موده کې بیا ۵۳۷ کسان روغ شوي هم دي.
د یاد وزارت مرستیال ویاند میرویس علیزی وايي: « تېرو ۲۴ ساعتونو کې د عامې روغتیا وزارت په خصوصي او دولتي روغتونونو کې ۵۰۹۶ مشکوک کسان ټسټ کړي، چې له دې ډلې ۱۵۷۵ پر کورونا وبا اخته شوي وه، ۸۶ له دې وېروس مړه شوي او ۵۳۷ نور ترې ښه شوي دي.»
روغتیا وزارت وايي، تازه ثبت شویو پېښو سره، په ټول هېواد کې د مثبتو پیښو شمیر ۱۰۹۵۳۲ ته او د مړو شمېر ۴۴۵۲ ته ورسېد.
یاد وزارت له خلکو غوښتي، چې کورونا مرګونې وبا دې عادي نه ګڼي او روغتیايي سپارښتنې دې عملي کړي.
کورونا وبا د لومړي ځل لپاره د ۲۰۱۹ زېږدیز کال په ډسمبر میاشت کې د چین مرکزي هوبي ولایت په ووهان ښار کې پیدا شوه.
د امریکا متحده ایالتو د جان هاپکنز پوهنتون د شمېرو له مخې، ټوله نړۍ کې پر کورونا وبا د اخته کسانو شمېر له ۱۷۹ میلیونو لوړ شوی او څه باندې ۳.۸۸ میلیونه کسان ترې مړه شوي دي.