د هېواد له لسو زیاتو ولایتونو کې د افغان ځواکونو او طالبانو ترمنځ د سختو نښتو پایله کې چې وسله وال طالبان په کې د شااوخوا ۶۸ ولسوالیو د نیولو ادعا کوي، خو د امنیتي او دفاعي سکتور ویاند اجمل شینواری د طالبانو دا ادعا ردوي او وایي، وسله والو طالبانو یوه سیمه هم د زور له لارې نه ده نیولې.
اجمل شنواری وايي، د لاسه وتلو سیمو او ولسوالیو د بېرته نیولو لپاره پلان جوړ شوی او ژر به عملي شي.
شینواری زیاته کړه:« ډېر ژر به د هیواد امنیتي وضیعت کنټرول شي، د دښمن پلانونه به شنډ شي دښمن هیڅ سیمه د زور له لارې نه ده نیولې او دښمن ددې وړتیا نه لري چې مخامخ جګړه وکړي.»
شینواري ومنله،چې په سوق اداره او تکتیکي برخه کې ستونزې وې،خو په وینا یې دا ستونزې حل شوي دي.
شینواری وایي: « په تکتیکي سطحه کې ستونزې وې او په تېرو درې ورځو کې مدیریت شو او لازم تدابیر ورته نیول شوي دي. په سوق او اداره کې چې کومې ستونزې وې، مدیریت شوي دي.»
د روانې جګړې له امله،چې د دواړو غاړو سربېره په کې عامو خلکو ته د سر زیان سربېره درانه مالي زیانونه اوښتي، د خلکو استازي یې نیابتي بولي او په وینا یې پردي جنګونه د یوه لوري په ګټه هم نه دي.
د پوځي چارو شنونکي نذیر خلیل وايي:« کومه جګړه،چي په افغانستان کي دوام لري، منشاء یې له بهر څخه ده. دا یوه نیابتي جګړه ده، دلته په افغانستان کې نور هېوادونه خپلي موخي لري او روانه جګړه افغانانو نه ده پیل کړې.»
وسله وال طالبان بیا ادعا کوي،چې جګړې ته حکومتي ځواکونو زور ورکړی او د دوی ترحاکمیت لاندې سیمو کې یې عملیات پیل کړي،خو افغان حکومت دغه ادعا ردوي او زیاتوي،چې طالبانو تربل هر وخت جګړې ته شدت ورکړی او ټول تمرکز یې د سیمو په نیولو او جګړې دی.