د هېواد له لسو زیاتو ولایتونو کې د افغان ځواکونو او طالبانو ترمنځ سختې نښتې شوې دي، چې وسله وال طالبان په کې د شاوخوا ۶۸ ولسوالیو د نیولو ادعا کوي، حکومتي مسوولین د طالبانو دا ادعا ردوي او زیاتوي چې هیڅ سیمه وسله والو طالبانو د زور له لارې نه ده نیولې.
د امنیتي او دفاعي سکتور ویاند اجمل شینواری وايي، د لاسه وتلو سیمو او ولسوالیو د بېرته نیولو لپاره پلان جوړ شوی او ژر به عملي شي.
د امنیتي او دفاعي سکتور ویاند اجمل شینواری وایي: «ډېر ژر به د هېواد امنیتي وضیعت کنټرول شي، د دښمن پلانونه به شنډ شي، دښمن هېڅ سیمه د زور له لارې نه ده نیولې او دښمن ددې وړتیا نه لري چې مخامخ جګړه وکړي.»
شینواري ومنله چې په سوق اداره او تکتیکي برخه کې ستونزې وې، خو په وینا یې دا ستونزې حل شوي دي.
شینواری وایي: «په تکتیکي سطحه کي ستونزې وې او په تېرو درې ورځو کې مدیریت شوی او لازم تدابیر ورته نیول شوي٬ په سوق او اداره کې کومې ستونزې چې وې، هغه مدیریت شوې دي.»
د روانې جګړې له امله چې د دواړو خواوو سربېره په کې عامو خلکو ته د سر زیان او درانه مالي زیانونه اوښتي، د خلکو استازي یې نیابتي بولي او په وینا یې پردي جنګونه د یو لوري په ګټه هم نه دي.
د ولسي جرګې یو شمېر غړي وایي: «کومه جګړه چې په افغانستان کي دوام لري، منشا یې له بهر څخه ده، دا یوه نیابتي جګړه ده، دلته په افغانستان نور هېوادونه خپلي موخي لري او روانه جګړه افغانانو نه ده پیل کړې.»
وسله وال طالبان ادعا کوي چې جګړې ته حکومتي ځواکونو زور ورکړی او د دوی تر حاکمیت لاندې سیمو کې یې عملیات پیل کړي، خو افغان حکومت دغه دعا ردوي او زیاتوي چې طالبانو تر بل هر وخت جګړې ته شدت ورکړی او ټول تمرکز یې د سیمو په نیولو او جګړې دی.