ترکیې ولسمشر رجب طیب اردوغان ویلي،ترکیه یوازینی د اعتماد وړ هېواد دی،چې افغانستان کې پاتې کیږي.
اردوغان ویلي، هېواد یې کولائ شي، د افغانستان په ثبات کې مهم رول ولوبوي او په دې تړاو به خپل امریکايي سیال جو بایډن سره په بروکسل کې دوه په دوه خبرې وکړي.
اردوغان زیاته کړه: « ترکي چارواکو په دې اړه چې له افغانستانه د امریکایي ځواکونو تر وتلو وروسته انقره د دې هېواد لپاره څه پلانونه لري، خپلو امریکایي همکارانو ته به معلومات ورکړي.»
خو طالبانو بیا په افغانستان کې د بهرنیو ځواکونو له پوځي شتون سره مخالفت ښودلی دی.
د امنیت شورا بیا ترکیې ته د کابل هوايي ډګر د امنیت ساتلو په تړاو څه نه وايي،خو زیاتوي،چې افغان حکومت چمتو دی،مسولیت واخلي او د یو شمېر هوايي ډګرونو د مسوولیت چارې ورسپارل شوې دی.
د امنیت شورا ویاند رحمت الله اندړ وايي:« له افغانستانه د بهرنیو ځواکونو له وتلو سره سم د لېږد کمیسیون جوړ شوی، چې تر اوسه یې بېلابېلې کمیټې جوړې کړي. په ملي او نړیواله کچه هوايي ډګرونو د امنیت خوندیتوب په میدانونو کې د سیستمونو تقویه او انکشاف اوله بهرنیانو څخه د وسایلو او تجهیزاتو سپارل د دوی مسولیت دی،چې تر اوسه پورې یې ځینې پړاوونه بشپړ شوي او کار یې دوام لري.»
د ولسي جرګې یو شمېر غړي بیا له ناټو غواړي،چې د کابل هوايي ډګر د امنیت لګښت دې افغان ځواکونو ته ورکړي، ترڅو په خپله افغانان ترې ساتنه وکړي.
د کابل نړیوال هوايي ډګر د امنیت ساتلو موضوع داسې مهال مطرح کېږي، چې د امریکا او ناټو ځواکونه له افغانستانه د وتلو په حال کې دي او نړیوالې ټولنې سره د یاد هوايي ډګر په ګډون کابل کې د بهرنیو سفارت خونو د امنیت په تړاو اندېښنې پيدا شوي دي.