د پاکستان پنجاب ایالتي حکومت پرېکړه کړې،چې د هغو کسانو سېم کارتونه به بند کړي، چې د کورونا وبا ضد واکسینو له لګولو انکار وکړي.
چارواکي وايي، له دې چارې یې موخه ډېرو خلکو ته د وبا ضد واکسین لګول دي.
دغه راز په دې لړ کې یو شمېر نور وړاندیزونه هم شته، ښايي پارکونو، رسټورانونو، حکومتي دفترونو او سرپټو بازارونو ته هم د هغو کسانو پر ننوتو بندیز ولګول شي،چې واکسین نه لګوي.
د چارواکو په خبره، لومړي پړاو کې به د سیم کارت بندولو پرېکړه پلې کېږي.
د عامې روغتیا ځايي چارواکي وايي، هغو کسانو ته به لومړی یو خبرداری استول کېږي، چې نه یې واکسین لګولي او نه یې هم د واکسین لپاره نوم لېکنه کړي وي.
چارواکي وايي، دې کسانو ته به ویل کېږي،چې د خپلې پېژندپاڼې شمېره باید د واکسین لپاره د نوم لیکنې چارواکو ته ورکړي او که څوک بیا هم نوم لیکنه نه کوي، د موبایل ټیلیفون هغه سیم به یې غیر فعال شي،چې د پېژندپاڼې له مخې یې ترلاسه کړی دی.
ځايي چارواکي وايي، دغه پرېکړه به رسما د روانې جون میاشتې پر ۳۰ مه پلې شي.
د رسمي شمېرو له مخې،په پاکستان کې تر اوسه پورې شااوخوا ۹.۵ ملیونه دوزه واکسین کارول شوی دی.
د امریکا متحده ایالتو د جان هاپکنز پوهنتون د شمېرو له مخې، پاکستان کې پر کورونا وبا د اخته کسانو شمېر ۹۳۸ زرو لوړ ته شوی او څه باندې ۲۱ زره کسان ترې مړه شوي دي.