د تخار بنګي ولسوالۍ په شینوارو کلې کې ۹ تنه غیرمسوول وسله وال د طالبانو په کمین کې وژل شوي او ګڼ نور یې ټپیان دي.
د دغه برید په غبرګون کې د غیر مسوول وسله والو قومندان حاجي فتیح بیا د شینوارو کلي شااوخوا شل تنه قومي مشران او ځوانان نیولي، وهلي او په نامالوم لور بیولي دي.
د شینوارو اوسېدونکي وایي، فتیح غیرمسوول وسله وال دی، خو د تخار ملي امنیت ریاست ملاتړ له ځان سره لري.
دوی وایي، فتیح د کندز تخار پر لویه لار د چشمه بنګي سیمه کې پاټک لري او د هر موټر څخه په زور پیسې اخلي، پښتانه مشران او ځوانان پرته له کوم جرم د طالب په نوم له موټر کښته کوي، شخصي زندانو ته یې اچوي او آن ډېری پښتانه یې وژلي هم دي.
خلک د تخار له چارواکو غواړي،چې د دغه غیرمسوول وسله وال مخه ونیسي.
د تخار والي ویاند حامد مبارز وایي، فتیح دا مهال د حکوکت په چوکاټ کې د تخار ملي امنیت ریاست سره ثبت دی، خو دا چې خلک ترې شکایت کوي، حکومت په دې تړاو کار کوي، تر څو د خلکو ستونزو ته رسېدنه وشي.
مبارز وایي، پرون شپه وسله والو طالبانو د فتیح کسانو ته کمین نیولی وه، یو شمېر کسان یې وژلي، خو دا چې فتیح بیا عام خلک ګروګان نیولي، حکومت ورسره خبرې پیل کړي او د نیول شویو خوشې کېدو لپاره هڅې روانې دي.
طالبانو بیا په دې اړه تر اوسه پورې رسنیو ته څه نه دي ویلي.
