ملا اختر محمد منصور د اسلامي امارت د لومړي زعیم او بنسټ اېښودونکي ملا محمد عمر مجاهد له وفات وروسته د اسلامي امارت د مشر په توګه وګومارل شو چې هغه مهال اسلامي امارت له بهرنیو ځواکونو سره په سختو نښتو بوخت.
ملا اختر محمد منصور داسې مهال د اسلامي امارت د مشرۍ مسوولیت پر غاړه واخېست،چې له سیاسي او امنیتي پلوه شرایط سخت ول، ان تر دې چې په اسلامي امارت کې د اختلافاتو خبرې راپورته شوې؛ خو منصور دغه ټول مسایل په سمه توګه مدیریت کړل، جګړه او سیاست یې سره یوشان مخته یوړل.
منصور د افغان ولس یووالي په برخه کې هم زیات شهرت درلود چې د تحلیل کوونکو باور همدې مسالې د سیمې او نړۍ استخبارات اندېښمن کړل او د نوموړي پر وژلو یې اقدام وکړ.
د هرات اطلاعاتو او کلتور مشر احمد الله متقي وايي: « منصور شهید په ډېرو سختو شرایطو کې د اسلامي امارت مسوولیت پر غاړه واخېست او امر شو، په ډېره سخته مرحله کې یې کار وکړ او په ډېره مېړانه یې د اسلامي امارت رهبري وکړه، سختې ستونزې یې وګاللې او د اسلامي امارت سالمه رهبري یې وکړه.»
د سیاسي چارو شنونکی عبدالحق حماد وايي: « شهید منصور رحمهالله د افغانستان په تاریخ کې کم مثاله مدبر مشر و. هغه وخت چې د اسلامي امارت زعامت او رهبریت ور له غاړې شو افغانستان خورا پېچلي حالت سره مخ و، منصور وکولی شو، چې د عالیقدر امیرالمومنین ملا محمد عمر مجاهد له وفات وروسته چې کومې ستونزې پېښې شوې وې، هغه په صف کې دننه په خورا ښه طریقه مدیریت کړي. له بل پلوه د مجاهدینو صفونه د اشغال پر وړاندې لا زیات منظم، منسجم او پیاوړي کړي او د نړۍ او اسلامي امارت ترمنځ د مذاکراتو او سیاسي اړیکو کوم باب چې پرانېستل شوی و هغه یې تقویه او لا پیاوړی کړ. همداراز یې د سیمې له هېوادونو سره اړیکې لا پراخه کړې.»
د سیاسي چارو شنونکی متین محمدخیل وايي: « ملا اختر محمد منصور په ۲۰۱۶ کال کې په داسې حال کې د اسلامي امارت قیادت پر غاړه واخېست چې له هر لوري یو ډېر بحراني حالت و؛ خو دوی په خپل مدبرانه سیاست وکولی شول چې ټولې لیکې برابرې کړي. نوموړی په وطن میین سړی و او ډېره هڅه یې کوله چې افغانستان د ولسونو ترمنځ یووالی وساتي او دا هر څه د دې لامل شول چې دلته د سیمې استخبارات او لرې پرتو استخباراتو له افغان ولسه د خطر احساس کاوه؛ نو ځکه د سیمې د استخباراتو په مرسته د لرو پرتو استخباراتو په واسطه یې له منځه یوړ.»
د ملا اختر محمد منصورپخواني ملګري وايي، نوموړی له سیاسي بصیرت برخودار او د جګړې پرتکتیکونو پوه وه.
دوی وايي، منصور د پخواني شوروي اتحاد د سرو لښکرو پر وړاندې جهاد کې هم ونډه درلوده او د ده وروستۍ هڅې هم د دې ښکارندويې کوي چې نوموړي د اسلامي امارت په بیا انسجام کې مهم رول درلود.
پخوانی طالب چارواکی سېد اکبراغا وايي: « د اسلامي امارت په باب منصور یو خواري کښ انسان و. د ده تګ نورو هېوادونو ته او د راتلو پر مهال یې په شهادت رسېدل خپله په دې دلالت کوي چې نوموړي د اسلامي امارت د پرمختګ لپاره هر څه کول. د ده شهادت په دوو لوریو تاوان و، په ایرانیانو هم تاوان و او په پاکستان هم، په ایرانیانو د دې لپاره تاوان و چې دی په ایران راتېر شو د ایران په مرز راووښت نو خلکو ویل دا به د ایران کار وي او په پاکستان باندې په دې تاوان و چې هلته پر ده دا موضوع راغله او په شهادت ورسېد.»
تېر کال د کابینې ځېنې غړو د ملا اختر محمد منصور د اووم تلین په یاد غونډه کې وویل، چې نوموړي د خپلې سیاسي مبارزې لپاره درې مهم ارزښتونه ټاکلي ول، چې اسلام ، د خپل ولس غوښتنې او همدا راز له نړۍ سره تعامل و، دا هغه درې لومړیتوبونه و چې نوموړي د خپلې مبارزې د سرټکو په توګه ټاکلي و.
د کانونو او پټرولیم وزارت سرپرست شهاب الدین دلاور وايي: « منصور جنګیالی و، په بهترینو غازیانو او مجاهدینو کې شامل و، د شوروي اتحاد له جهاده تر اخر د شهادته پورې. منصور سیاستوال و او سیاست یې یقیني موږ ته مالوم و. ما چې فکر ورته کړی و منصور په خپل معیار هر څه په تول کې اچول، نوموړي شرعیت، د ملت غوښتنې او له نړۍ سره تعامل غوښته.»
د ریاست الوزرا اداري مرستیال عبدالسلام حنفي وايي: « ملا اختر محمد منصور د هغو کسانو له ډلې و چې د مجاهیدنو له قافلې او له هغو کسانو له قافلې سره یو ځای شو، چې د نظم او امنیت د تامین او د اسلامي نظام د حاکمیت په خاطر یې مبارزه پیل کړه.»
له هغې وروسته چې ملا اختر محمد منصور د اسلامي امارت د زعیم په توګه وټاکل شو له سیمې او ګاونډیو سره د اسلامي امارت د اړیکو لمن هم پراخه شوه؛ خو بلاخره د سیمې د استخباراتو په مرسته ۱۳۹۵ کال د جوزا په لومړۍ نېټه د پاکستان په بلوجستان ایالت کې د امریکا د بې پیلوټه الوتکې په برید کې ووژل شو.
ملا اختر محمد منصور په پخواني او اوسني اسلامي امارت کې پر بېلابېلو پوسټونو دندې ترسره کړې وې، د کندهار د هوايي میدان مسوول، د هوايي ځواک قوماندان، د هوايي چلن وزیر، د هوايي ځواکونو قوماندان اوهمداراز د پاکستان له لوري د ملا عبدالغني برادر له نیول کېدو وروسته د اسلامي امارت د مرستیال په توګه وټاکل شو.
ملا اختر محمد منصور د کندهار ولایت د میوند ولسوالۍ د بند تیمور کلي اوسېدونکی وه، چې پلار یې حاجي محمد جان نومېده، نوموړي خپلې لومړنۍ زده کړې په خپل کلي کې ترسره کړې وې او وروسته بیا د لوړو دیني زده کړو لپاره کوټې او پیښورته تللی و.
