د کار او ټولنیزو چارو وزارت وايي، ۴ میلیونه ماشومان له زده کړو بې برخي دي، چې ۳ میلیونه یې اوس شاقه یا درانه کارونه ترسره کوي.
یاد وزارت د ماشومانو پر وضعیت اندېښنه ښودلې او وایي، یوازې ۶۰ سلنه ماشومان د سړکونو پر سر کار کوي،۲۰ سلنه د مافیایي کړیو له لوري کارول کېږي او پاتې نور د معتادو کورنیو له لوري اړ اېستل شوي دي.
د ماشومانو ساتنې مشر نجیب اخلاقي وايي: « د سرکړنو پرسر هغه ماشومان چې کار کوي،۶۰ سلنه یې اړمن دي. ۲۰ سلنه د مافیايي کړیو له لورې کارول کېږي او ۲۰ سلنه نور د کورنیو له لوري اړ اېستل شوي چې سړکونو ته ووځي.»
په افغانستان کې د ماشومانو نړیوال سازمان استازو بیا ټینګار کړی چې تر ۲۰۲۵ زېږدیز کال پورې باید د افغان ماشومانو د اوسني حالت بدلولو لپاره جدي ګامونه پورته شي.
بل پلو په کابل کې د بریټانیا سفارت هم د افغان ماشومانو په اړه اندېښنه ښودلې او زیاته کړې یې ده چې دا مهال د افغانستان ۹ میلیونه ماشومان مرستو ته اړتیا لري.
په افغانستان کې د بریټانیا سفارت استازی کارډي وایي: « د سیمې په کچه ۶۲ میلیونه ماشومان پر سختو او درنو کارونو بوخت دي. دا ماشومان په افغانستان، پاکستان، بنګله دېش، ایران، او نیپال هېوادونو کې اوسېږي، چې ډېره برخه یې په افغانستان کې ده. د افغانستان ۹ میلیونه ماشومان بېړنیو مرستو ته اړتېا لري.دغو ماشومانو د بېلابېلو ستونزو له امله درنو کارونو ته مخه کړې ده. موږ د اې آر سي پروژې ملاتړ کوو او هڅه مو دا ده، چې تر ۲۰۲۵ کال پورې په افغانستان کې پر ماشومانو د درنو کارونو کچه را ټيټه او له منځه یوسو.»
جګړه ،فقر، ناامني، د مخدره توکو کارول هغه لاملونه دي،چې په هیواد کې یې ۴ میلیونه ماشومان له زده کړو محروم کړي او شااوخوا ۳ میلیونه نور یې درنو کارونو ته اړ کړي دي.
