د طالبانو یوه جګپوړي چارواکي له رسنیو سره په خبرو کې ویلي، په هغه صورت کې د استانبول ناسته کې ګډون کوي،چې یاده ناسته لنډه وي،د ناستې اجنډا کې د مهمو موضوعاتو په اړه پرېکړې شاملې نه وي او د طالبانو شتون په کې په ټيټه کچه وي.
د طالبانو یوه بل مهم چارواکي هم په استانبول ناسته کې د ګډون له پاره د طالبانو دغه درې شرطونه تائید کړي.
ټاکل شوې وه،د امریکا متحده ایالتونو په وړاندیز د افغان سولې په اړه دغه ناسته د ترکیې او قطر په کوربتوب د اپرېل په ۱۶مه نېټه د لسو ورځو له پاره پیل شوې وای، خو طالبانو تېره میاشت وویل، د ناستې جزئیات له دوی سره نه دي شریک شوي او له همدې امله کې ګډون نه پکې کوي.
تر هغه وروسته د ترکیې د بهرنیو چارو وزارت د یوې خبرپاڼې په خپرولو سره وویل، د افغان د سولې په اړه د استانبول ناسته به د اپرېل میاشتې له ۲۴ مې بیا د مې تر څلورمې پورې تر سره شي، خو طالبانو یو ځل بیا په دغه ناسته کې له ګډون انکار وکړ.
طالبانو وویل، تر هغو چې په افغانستان کې بهرني ځواکونه شتون ولري، دغه ډله به د افغانستان د راتلوونکي په اړه په هېڅ تصمیم نېوونکې ناسته کې ګډون ونه کړي.
دغه طالب چارواکي په دې اړه چې د استانبول ناسته کې به د طالبانو پر استازولۍ کوم اشخاص ګډون وکړي،څه نه دي ویلي.
بل پلو د افغانستان مذاکراتي پلاوي غړي نادر نادري ،د استانبول ناسته کې په درې شرطونو د طالبانو د ګډون په اړه ناخبري وښووله او وايي تر اوسه پورې دوی ته په دې اړه رسمي معلومات نه دي رسېدلي.
