د افغانستان عامې روغتیا وزارت وایې،هره ورځ د پلازمېنې کابل په ګډون ډېری ولایتونو کې د کورونا وبا مثبتې پېښې او د مړینې کچه لوړېږي.
د یاد وزارت مرستیال ویاند میروس علیزي خبرداری ورکړ،که خلک یې پر وړاندې بې غوري وکړي، لوی ناورین به رامنځته شي.
روغتیا وزارت اندېښنه لري او زیاتوي، چې یواځې د ناروغانو د درملنې او د عامه پوهاوي تدابیر یې جدي کړي، خو دا کار یواځې د روغتیا وزارت مسوولیت نه دی.
د عامې روغتیا وزارت مرستیال ویاند میرویس علیزی وایي:« ټول اړین تدابېر نېول شوي، خو له بده مرغه اوسني حالت په کتو باید ووایو، د کورونا وبا مثبتې پېښې ورځ تر بیلې زیاتېږي.»
د روغتیا وزارت د مالوماتو له مخې په تېرو ۲۴ ساعتونو کې د کورونا وبا له امله ۱۹ کسانو خپل ژوند له لاسه ورکړی او له شااوخوا۸۴۰ مثبتې پېښې ثبت شوي،چې دا په دې وروستیو کې تر ټولو لوړه ورځنۍ شمېره ده.
علیزی وایي:« موږ په دوه یا درې ورځو کې د کورونا وبا له امله ډېره مړېنه لرو. نن ۱۹ کسان او پرون ۲۴ کسان د کورونا وبا له امله مړه شوي. دا په تېرو شپږ یا اوو میاشتو کې لومړی ځل دی، چې د کورونا وبا مثبتو پېښو او مړېنو شمېر کې زیاتوالی راځي.»
د دې وېروس پر وړاندې لا هم د کابل په ګډون ټولو ولایتونو کې د واکسین تطبیق لړۍ روانه ده.
بل پلو ښاریان هم د کورونا وبا درېیمې څپې اندېښمن کړي او له مسوولینو غواړي، چې د عامه پوهاوي پرګرامونه لا زیات کړي.
روغتیا وزارت له خلکو غواړي، چې روغتیايي سپارښتنې عملي او له اړتېا پرته دې له خپلو کورونو بهر نه شي.
