د امریکا دفاع وزارت او د دې هېواد مرکزي قوماندانۍ ۲۰۲۱ کال د اګست په ۲۶مه د تخلیې پروسې پر مهال، د کابل هوايي ډګر ختیځې دروازې مخې ته د داعش ډلې د ځانمرګي برید په تړاو نوي جزئیات خپاره کړي دي.
په دې جزئیاتو کې د بریدګر نوم عبدالرحمن اللوګری یاد شوی او ویل شوي چې نوموړی له ۲۰۱۶ز کال څخه داعش ډلې سره یوځای شوی و او د زندانونو د ماتېدو پرمهال له زندانه ازاد شوی و.
دامریکا دفاع وزات له لوري په تازه جزئیاتو کې راغلي چې دغه برید له مخکې د مخنیوي وړ نه و او د بریدګر د لیدلو په تړاو هلته د حاضرو امریکايي سرتېرو ادعاوې هم رد شوي.
یاد وزارت زیاته کړې:« ارزونه تائیدوي چې بریدګر د داعش خراسان ډلې اړوند ځانمرګی بریدګر و. د ارزونې او بیاکتنې ډلې غړو په خپلو وروستیو څرګندونو کې ویلي چې دغه برید په تکتیکي لحاظ له ترسره کېدو وړاندې د مخنیوي وړ نه و.»
د برید په تړاو لومړۍ ارزونه د ۲۰۲۱ز کال نومبر میاشت کې بشپړه شوه او له هغې وروسته په دې تړاو نهايي ارزونه د روان ۲۰۲۴ کال د جنورۍ په ۱۶مه بشپړه شوې چې په دې موده کې یې له ګڼو امریکايي سرتېرو سره د پېښې په تړاو مرکې شوي دي.
په ورته مهال د امریکا د مرکزي قوماندانۍ ارزونې موندنې هم ښيي، چې برید د مخنیوي وړ نه و او نه هم هلته د هغو سرتېرو له لوري لیدل شوی چې د امریکا د کانګرس د بهرنیو اړیکو له کمېټې سره په خبرو کې د بریدګر د لیدلو ویلي وو.
یادې قوماندانۍ زیاته کړې:« د کابل په هوايي ډګر کې ترهګریز برید د مخنیوي وړ نه و… . ځانمرګی بریدګر له برید وړاندې د خلکو په منځ کې نه و پېژندل شوی او نه هم سرتېرو دا فرصت درلود چې بریدګر ښکېل کړي.»
بل پلو د سیاسي چارو شنونکي په دې باور دي که امریکا اوس غواړي د دې پېښې ملامتیا له ځانه لري کړي خو د ورځې په پای کې یې اصلي مسوولیت دغه هېواد ته ورګرځي.
دوی په بېباک ډول او له هر راز مصونیت پرته د تخلیې پر پروسې سخته نیوکه لري چې له امله یې ډېری کسان د مرګ ګواښ سره مخ شول.
د سیاسي چارو شنونکی شېر حسن حسن وايي:« دغه ډول وتل ، د امریکا سیاسي مشرتابه د حماقت ترکچې د هغوی بېباکي ثابتوي او د هغوی د تصمیم غلطي ثابتوي، له دې امله نه امریکايي سرتېری په دې خبره کې ملامت دی، نه کوم بل څوک، نه طالبان ملامت دي او نه د افغانستان حکومت، د امریکا پوځي مشرتابه په دې خبره کې ملامت ده.»
»
په دې ځانمرګي برید کې چې د ۲۰۲۱ز کال د اګست په ۲۶ مه د کابل هوايي ډګر ختیځې دروازې مخې د خلکو په ګڼه ګوڼه کې ترسره شو، ۱۳ امریکايي سرتېري او شاوخوا درې سوه افغانانو ته په کې مرګ ژوبله واووښته چې مسوولیت یې د داعش خراسان څانګې پر غاړه واخیست.
