د نېکمرغه کوچني اختر د مبارکۍ پیغامونو په لړ کې پخوانیو چارواکو، سیاسیونو او د پښتون ژغورنې غورځنګ سربېره دامریکا سفارت هم په خپل وار افغانانو ته اختریزې مبارکۍ وړاندې کړې دي.
پخواني ولسمشر حامد کرزي په اختریز پیغام کې افغانستان د ټولو افغانانو ګډ کور بللی او ویلي یې دي چې ټول پهکې په مساویانه توګه حق لرو، هر یو د وطن په وړاندې مسوولیت لرو او باید ومنو چې پرته له تعلیم پرمختګ شونی نه دی.
کرزی وايي:« د نېکمرغه کوچني اختر د رارسېدو له امله خپلې نېکې هیلې او مبارکۍ تاسو ته وړاندې کوم. ګرانو هېوادوالو! افغانستان د ټولو افغانانوټولو ګډ کور دی ، ټول په مساویانه توګه په کې حق لرو او همدا راز هر یو د خپلو خلکو او هېواد په وړاندې مسوولیتونه او وجایب هم لرو، هرڅه له تعلیم او پوهې سره تړلي دي او پرته له هغې ناممکن دي. که چېرې غواړو چې خپلواک، آباد او مترقي هېواد ولرو نو لازمه ده چې د هېواد د بچیانو(نجونو او هلکانو) تعلیم ته اساسی او جدي پاملرنه وکړو.»
بل خواد مخکېني حکومت ملي روغې جوړې سترې شورا مشر ډاکټر عبدالله عبدالله هم پر خپله فېسبوک پاڼه اختریز پیغام کې په هېواد کې ټولو قومونو ترمنځ د یووالي غوښتنې سربېره ، له نړیوالې ټولنې د مرستود دوام هیله ښودلې ده.
د مخکېني حکومت بهرنیو چارو وزیر محمد حنیف اتمر افغانانو ته د اختر مبارکۍ ترڅنګ بیا د فلسطین مظلومو خلکو او د ټولې بشري ټولنې لپاره د سولې او هوسا ژوند دعا کړې.
هغه زیاته کړې:« د نېکمرغه کوچني اختر د رارسېدو په مناسبت خپلو ټولو درنو هېوادوالو او د نړۍ مسلمانانو ته د زړه له کومې مبارکي وایم ، عبادت مو د حق په درګاه کې قبول شه! موږ د افغانستان او فلسطین د مظلومو خلکو او د ټولې بشري ټولنې لپاره د سولې، ارامۍ او خوښۍ دعا کوو.»
ورته مهال په پښتونخوا کې د پښتون ژغونې غورځنګ مشر منظوراحمد پښتین د اخترمبارکۍ پیغام کې په هېواد کې سوکاله ژوند سره د علم په زیور د سمبالښت هیله کړې.
هغه زیاته کړې:« ټولو مسلمانانو او په ځانګړې توګه پښتنو افغانانو ته د کوچني اختر مبارکي وایم. الله مو روژې او عبادتونه قبول کړه. زه دعا کوم، چې الله ج زموږ ولسونو ته د علم، تنظیم، حوصله او د قوت توفیق راکړي، تر څو په خپل وطن کې سوله، خوښي او خپلواکي ولرو.آمین.»
دافغانستان لپاره د امریکا سفارت پر اېکس پاڼه خپاره شوي پيغام کې د نړۍ ټولو مسلمانانو لپاره له برکتونو ډک اختر غوښتی دی.
سفارت زیاته کړې:« د نیکمرغه کمکي اختر د رارسیدوپه مناسبت تاسو او ستاسو دوستانو ته د خوښۍ، سولې او له برکتونو څخه د ډک اختر هیله کوو.»
سره له دې چې پخواني ولسمشر حامد کرزي او ګڼ شمېر سیاسیونو په خپلو اختریزو پيغامونو کې د نجونو تعلیم او تحصیل اساسي اړتیا بللې او له تعلیم او پوهې پرته يې آبادي او پرمختګ ناممکن ګڼلی خو په ارګ کې د اختر په مناسبت جوړو شویو مراسمو ته، لوړپوړو چارواکو په ویناوو کې په دې تړاو هیڅ نه دي ویل شوي چې د نجونو ښوونځي او پوهنتونونه کله پرانېستل کیږي؟
