ولسمشر غني، د کابل ښار د لومړۍ امنیتي حوزې ۱۶ منسوبینو ته د بریال دویمې درجې دولتي مډالونه ورکړل.
په دغه غونده کې ولسمشر د امریکایي ځواکونو د وتلو اعلان ته په اشارې وویل، موږ له دوو کلونو راهیسې دې ورځې ته بشپړ چمتووالی لرو او د هغوی د وتلو لپاره مو هر اړخیز پلان برابر کړی.
ولسمشر وویل، طالبان د جګړې د دوام مشروعیت نه لري او هغوی، چې د جمهوریت صف کې نه ودریږي دولت کې یې ځای نشته.
ولسمشر اشرف غني وایي: ((یو د جمهوریت صف دی او بل د دښمن، هغوی چې د جمهوریت په صف کې نه درېږي نور ورته په دولت کې ځای نشته. طالبان د جګړې د دوام لپاره هېڅ راز دیني مشروعیت نه لري او یو په بل پسې د اسلامۍ نړۍ د دیني علماوو ټولنو د افغانستان جګړه ناروا بللې ده.))
ولسمشر له افغانستان سره د سیمې هېوادونو د اړیکو بیاکتنې ته په اشارې وویل: (( نن د پاکستان لپاره د تصمیم ورځ ده، که زموږ هیواد نارامه وي د دوی هیواد به هم ناارامه وي او که زموږ هوساینه غواړي دوی به هم هوسا شي. د دوستۍ او دښمنۍ انتخاب د دوی په لاس کې دی او د دوستۍ په صورت کې افغانستان تیار دی چې د سیمې او نړۍ هیوادونو د همکاریو په زیاتوالي کې له پاکستان سره همکاري وکړي. ))
ملي حاکمیت، جمهوریت، ولسواکي، اباد، ازاد او خپلواک افغانستان دی، خپل لیدلوری یاد کړ او ټینګار یې وکړ، که طالبان په دې چوکاټ کې سوله کوي زموږ غېږ ورته پرانېستې ده.
ولسمشر وویل، که طالبان جګړه انتخابوي ډار نه بلکې ټینګه اراده لرو.
