د اسلامي امارت مشرتابه د حکم له مخې، د اختر را رسېدو په مناسبت ۲۸ تنه ماشومان د اصلاح او روزنې له مرکزه رخصت شول او په ياد مرکز کې د ۳۱ نورو ماشومانو د اصلاح موده له یوې تر شپږو میاشتو را کمه شوې ده.
مسوولین د پاتې ماشومانو کورنیو ته په دې مرکز کې د هر ډول ښوونیزو او خوراکي موادو د شتون د ډاډ ترڅنګ، د دې ماشومانو له کورنیو غواړي چې خپلو ماشومانو ته ځیرک مبایلونه ورنه کړي او پر ځای دې زدهکړو او خپل راتلونکي ته وهڅوي.
د زندانونو چارو د سمون ادارې نظامي مرستيال حبیب الله بدر وايي: « د دغو ماشومانو د کورنیو غړیو ته ډاډ ورکوم چې دا د جمهوریت وخت نه دی اسلامي امارت دی، په الله مې دې قسم وي چې هر څومره راته زمینه برابره شي او په کلونو کور ته لاړ نه شم؛ خو ستاسو ماشومانو ته به زه زده کړې او ترتیب جوړوم.»
د دې مرکز مسوولین بیا وایي، د روژې له پیل راهیسې تر دې دمه ۸۱ ماشومان خوشې شوي، چې په دې مرکز کې د شته ماشومانو درېیمه برخه تشکیلوي.
د يادو ماشومانو له ډلې ۲۳ تنه د مواد مخدر له اختصاصي مکحمې له لوري ازاد شوي، چې پاتې هغه یې په جنایي جرمونو نیول شوي وو.
د ماشومانو اصلاح او روزنې مرکز رئیس نظرمحمد ناصري وايي: « موږ له تاسو غواړو چې دلته مو ښوونځی ولوسته، مدرسه مو ولوسته، چې کورونو ته لاړئ هم مدرسه او ښوونځی تعقیب کړئ.»
د ماشومانو د اصلاح او روزنې مرکز د محاکمو د ارتباط امر محمد زمان رحماني وايي: « ۲۸ کسان د امیرالمومینین حفظه الله د حکم او د سترې محکمې د پرېکړې پر بنسټ د شنبې په ورځ د اصلاح او روزنې مرکز له قیده خوشې شول او ۲۳ کسان نور چې د نشهيي توکو په قضیو تورن وو د نشه يي توکو د اختصاصي محکمې له لوري تېره ورځ خوشې شول.»
د ماشومانو د اصلاح او روزنې په مرکز کې د روزنې مسوولین وایي، پر خوراکي توکو سربېره یې ماشومانو ته د زدهکړو په برخه کې هر ډول امکانات برابر کړي او له پاتې ماشومانو غواړي، چې له دې ځایه له ازادېدو سره سم خپلو زدهکړو ته پاملرنه وکړي.
بل لور ته خوشې شوي ماشومان هم د اصلاح او روزنې له دې مرکز خوښي څرګندوي او په خبره یې له ازادېدو وروسته به په دې هڅه کې وي، چې خپلو لوړو هیلو ته ځان ورسوي.
د ماشومانو د اصلاح او روزنې په مرکز کې د لېسې مشر محمد شفیق حقپال وايي: « په دې مرکز کې ټولو ماشومان لپاره د هغوی له سویې سره سم د زده کړو زمینه برابره شوې ده. موږ د دې ماشومانو له کورنیو غواړو چې کله د دوی ماشومان له دې ځایه خوشې کېږي نو دوی ته ځانګړې پاملرنه وکړي او توصیه مو خپلو زده کوونکو ته هم دا ده چې که غواړئ په دنیا او اخرت کې بریالي اوسئ؛ نو خپل دین او قلم ته مخه کړئ.»
یو تن خوشې شوی ماشوم سیر وايي: « اووه نیمې میاشتې کېږي زه دلته راغلی وم او له اسلامي امارته راضي یو، ښوونځی، درسونه، مدرسه هر څه راته برابر وو، اوس دا دی خوشې شوم نور به هم خپلو زده کړو ته دوام ورکړم. حرفوي زده کړې هم راته برابرې وې، سهار لخوا ښوونځي ته تلو او وروسته مو نورې برخې پرمخ وړلې، پنځه وخته مو په جماعت لمونځ کولو.»
د اصلاح او روزنې په دې مرکز کې ټول هغه کسان چې اوسېږي د اختر په را رسېدو سره له جامو سربېره ټولو ته اختریزې ډالۍ هم ورکړل شوې.
