قطر کې د طالبانو د سیاسي دفتر ویاند محمد نعیم وایي چې پرون ماسپیښين د دې دفتر مشر ملا برادر او د مذاکراتي ټيم مشر شيخ عبد الحکيم حقاني د افغان سولې لپاره د امريکا له ځانګړي استازي زلمي خليلزاد او په افغانستان کې د امریکایي ځواکونو له قومندان جنرال سکاټ مېلر سره کتلي دي.
محمد نعیم دغه راز وایي، په دغه کتنه کې دواړو خواوو د امریکا او طالبانو تر منځ د هوکړې پر اهمیت او د دې هوکړې د ټولو مادو پر پلي کېدو خبرې وکړې.
محمد نعیم زیاتوي، په دغه کتنه کې طالب پلاوي د خپلو پاتې بنديانو د خلاصون او د تورو ليستونو پای ته رسولو موضوعاګانې چې د دوحې تړون مهمې مادې دي، یادې کړې او ټینګار یې وکړ چې د یادو دوو موضوعاګانو په اړه عملي ګامونه نه اخيستل، د مذاکراتو پر روان بهير منفي اغيز کوي.
دا په داسې حال کې ده چې له نن سره ۱۱ ورځې کېږي چې هېڅ ډول رسمي ناسته د سولې مذاکراتي پلاویو ترمنځ نه ده ترسره شوې.
سرچینې وایي، په پام کې وه نن دواړه ټیمونه ناسته ترسره کړي، خو د تمې خلاف، بیا هم کومه ناسته ونشوه.
د جمهوریت د مذاکراتي ټیم ځینو غړو بیا شمشاد ته ویلي چې دوی د خبرو پيل کې ستونزه نلري او دوی د طالبانو غږ ته په تمه دي.
د سولې بهیر څارونکي بیا وايي چې طالبان خبرو ته بېړه نلري او غواړي چې د امریکا د نوې ادارې رسمي تګلاره واوري.
