وړمه شپه شاوخوا درې بجې پاکستاني جېټالوتکو د پکتیکا برمل او خوست ولایت سپېرې ولسوالیو کې پر ملکي وګړو بریدونه کړي، ټول قربانیان یې ملکي وګړي دي چې په پراخه کچه غندل شوي او د پاکستان دغه عمل یې پر افغان خاوره ښکاره تېری بللی دی.
پخواني ولسمشر حامدکرزي پر خپله اېکس پاڼه پر ملکي افغانانو بمباري د ټولو نړیوالو نورمونو او اصولو خلاف عمل یاد کړی او د اسلاماباد د نوي حکومت پالېسي یې ننګولې ده.
کرزی زیاتوي: « د خوست او پکتیکا ولایتونو پر سیمو د پاکستاني ځواکونو هوايي بریدونه په کلکو ټکو غندم او دا د هېواد له ځمکنۍ بشپړتیا څخه ښکاره سرغړونه او د نړیوالو موازینو او ګاونډیتوب نقض ګڼم. د پاکستان له خوا دغه ډول کړنې د دواړو هېوادونو د اړیکو د خرابېدو لامل کیدای شي. له افغانستان سره د ښه ګاونډیتوب پر بنسټ د متمدنو اړیکو رامنځته کول د دواړو هېوادونو په ګټه دي او اسلام اباد دې په خپلو تګلارو کې بدلون راولي او د سیمې امنیت او ثبات تامین لپاره دې پالېسۍ بدلې کړي..»
د مخکېني حکومت د بهرنیو چارو وزیر محمد حنیف اتمر پاکستان د ترهګرۍ په روزنه او تمویل تورن کړی او ټينګار یې کړی چې د پاکستان پوځ باید هوښیارتیا وښي، په سیمه کې د ترهګرۍ او بې ثباتۍ پر وړاندې د مبارزې تر ټولو اغېزمنه لارغوره کړي او په خبره یې هغه لار د ترهګرو د روزنې او ملاتړ څخه لاس اخېستل دي.
اتمر وايي: « موږ پر افغان خاوره د پاکستان د پوځ وروستي هوايي بریدونه غندو او دا د نړیوالو معیارونو، قوانینو او د افغانستان له ملي حاکمیت او ځمکنۍ بشپړتیا څخه ښکاره سرغړونه ګڼو. دا بریدونه چې د بې ګناه خلکو د وژل کېدو او ټپي کېدو لامل شوي، د کرکې وړ دي او د جدي بې ثباتۍ لامل کېږي. همدارنګه د هېواد اوسني واکمنان باید پوه شي چې د افغانستان د خلکو له یووالي او ملي مشارکت پرته له هېواد څخه د ډاډ وړ دفاع امکان نه لري.»
د پاکستان هوايي بریدونو په غبرګون کې اسلاميامارت په خپره کړې اعلامیه کې یاد هېواد ته خبرداری ورکړی چې دغه ډول کړنې بدې پایلې درلودلی شي چې بیا به یې کابو کول د پاکستان له وس پورته وي.
دغه راز د افغانستان اسلامي امارت د بهرنیو چارو وزارت په کابل کې د هغه هېواد د سفارت سرپرست عبیدالرحمان نظاماني احضار کړی او احتجاجلیک یې ورسپارلی دی.
د اعلامیې یوه برخه: « د ا.ا.ا. د بهرنیو چارو وزارت د پاکستان بریدونه غندي او پاکستان ته وریادوي، چې د افغانستان اسلامي امارت د نړۍ د زبرځواکونو پر خلاف د ازادۍ د اوږدې مبارزې تجربه لري او په خپله خاوره تېري په هېڅ ډول نه شي زغملی.»
د پاکستان هوايي ځواک د دوشنبې په شپه شاوخوا درې بجې ډیورنډ فرضي کرښې ته نږدې د خوست او پکتیکا ولایتونو په سپېره او برمل ولسوالیو کې د ملکي خلکو پر کورونو هوايي بریدونه وکړل، چې د ښځو او ماشومانو په شمول په کې ۱۱ تنه ملکي کسان مړه شول.
د پاکستان پوځ ته نږدې رسنیو او ادرسونو کې ادعا شوې وه چې په برید کې یې عبدالله شاه مسعود چې د تحریک طالبان پاکستان یا ټيټي پي مهم قوماندان دی وژلی؛ خو له بریدونو څو ساعته وروسته نوموړي له څو نورو ملګرو سره له ډيورنډ فرضي کرښې هاغاړې تازه ویډیو ثبت کړې او د پاکستاني پوځ ادعاوې یې رد کړي دي.
