افغانستان کې د امریکايي او بهرنیو ځواکونو د وتو او پاتې کېدو په تړاو ضد او نقیض نظریات موجود دي، خو په کابل کې د امریکا او ناټو پوځي مشر وايي، طالبانو سره هوکړې ته ژمن دی او د هوکړې په اساس به عمل کوي.
په افغانستان کې د ناټو ځواکونو عمومي قومندان جنرال سکاټ مېلر وایي، ((موږ به شرایطو ته په کتو سره سرتیري له افغانستان څخه وباسو ځکه دلته د سیاسي بهیر او ترهګرۍ سره د مبارزې موضوع مطرح ده. موږ د هوکړې عملي کولو ته ژمن یو او افغانستان باید په داسې حالت کې پرېږدو چې با ثباته وي، امن وي او داسې حالت کې وي چې خپلې ستونزې په خپله حل کړي.))
د طالبانو او امریکایانو تر منځ هوکړه کې ژمنه شوې چې امریکا به په څوارلسو میاشتو کې خپل او د ناټو غړو هېوادونو زرګونه پوځیان له افغانستان څخه وباسي.
اوس ددغې ژمنې پوره کېدو ته لږ تر لږه درې میاشتې پاتې دي.
جنرال مېلر روان وضعیت ته په کتو هغه ژمنه بیا تازه کړه چې له افغان امنیتي او دفاعي ځواکونو څخه به ملاتړ ته دوام ورکړي.
مېلر وایي، (( موږ له هوکړې سره سم سرتیري کموو، خو د افغانستان خلک دې ډاډه وي چې موږ له افغان امنیتي ځواکونو سره د اړتیا په صورت کې پوځي مرسته کوو. موږ د روزنې بهیر هم روان ساتلی او د غوڅ ملاتړ په ځواکونو کې یوازې امریکايي سرتیري نه دي بلکې د نورو هېوادونو سرتیري هم شامل دي چې مرستې کوي.))
امریکا داسې مهال له طالبانو سره د شوې هوکړې عمل ته ژمنتیا ښيي چې دواړو خواوو په وار وار یو بل د هوکړې په نقض تورن کړي دي.
جنرال سکاټ مېلر زیاتوي، (( موږ مخکې هم ویلي دي چې تاوتریخوالی زیات شوی دی او هره ورځ زیاتیږي، خو له بده مرغه د دې تاوتریخوالي بیه د افغانستان خلک ورکوي او باید روان تاوتریخوالی صفر ته راټیټ شي.))
امریکا اوس افغانستان کې څلور زره ځواکونه لري او ژمنه یې کړې چې دغه شمېر به تر راتلونکې جنوري میاشتې ۲۵۰۰ ته را کم کړي.
د امریکايي سرتیرو سربیره د ناټو غړي هېوادونه بیا څه باندې اته زره سرتیري لري چې ځینو هېوادونو یې د ایستلو خبره کړې ده.
