ټاکل شوې ده، چې راتلونکې مياشت په افغانستان کې له منځنۍ اسيا سوېلي اسيا ته د انرژۍ د لېږد کاسازر پروژې د تطبيق عملي چارې پيل شي.
چارواکي وايي، د يادو کارونو د پيلېدو په اړه په ترکيې کې د افغانستان، تاجکستان، قرغزستان، پاکستان او نړيوال بانک استازو ترمنځ ناسته شوې او د دوه ورځنيو بحثونو په پايله کې يې هوکړه شوې، چې په راتلونکې اپریل کې په افغانستان کې د کاسازر پروژې د طبيق عملي چارې پيل شي.
د اسلامي امارت د ویاند مرستیال حمدالله فطرت وايي: « تېره ورځ د کاسازر پروژه، چې له منځني اسیا سوېلې اسیا ته د برېښنا د لېږد یوه مهمه پروژه ده، د قرغزستان، ازبکستان، افغانستان او پاکستان ترمنځ لاسلیک شوه، نړیوال بانک د دې پروژې مالي ملاتړ کوي او ان شاءالله چارې به یې عملاً د راروانې میاشتې په پای کې پيل شي. د کاسازر پروژې تاسیسات به په افغانستان کې د ۵۸۰ کیلو مترو په اوږدوالي د کندز له شېرخان بندره پیل او د ننګرهار تر تورخمه به بشپړ شي.»
سرپرست حکومت د افغانستان په حدودو کې د يادې پروژې د تطبيق لپاره بشپړ چمتووالي ښيي او زياتوي، د کاسازر پروژه د قرغزستان او تاجکستان برېښنا د ۱۲۵۰ کیلومټرو په اوږدوالي سره د افغانستان له لارې پاکستان ته لېږدوي او له دې پروژې به پاکستان زر میګاواټه برېښنا او افغانستان درې سوه میګاواټه برېښنا ترلاسه کړي.
د اقتصاد وزارت مسلکي معین عبداللطیف نظري وايي: « د کاسازر پروژه د هېواد په اقتصادي وده او پراختیا کې اړین رول لري او هم به د سیاسي ثبات د پياوړي کېدو لامل شي او هم به افغانستان له سیمې سره د اتصال په محور بدل کړي.»
په ټوله کې کابو څه کم یو اعشاریه دوه مېلیارد ډالره د دغې پروژې لګښت اټکل شوی او نړيوال بانک يې د ورکړې زمواري اخېستې.
د اقتصادي چارو کاروپوهان د دې پروژې پلي کېدل د افغانستان او سیمې د هېوادونو د اقتصادي اړیکو د پیاوړتیا لپاره مهم بولي.
اقتصاد پوه عبدالنصیر رشتیا وايي: « د کاسازر پروژه د سیمې تر ټولو لویه پروژه ده، کله چې دا پروژه پیل شي افغانستان ته د ۳۰۰ میګاواټه برېښنا سربېره له منځنۍ اسیا هېوادونو څخه سوېلې اسیا ته برېښنا د لېږد د نوو لیکو دهلېز پرانیزې او دا به هېواد ته ډېر ګټور تمام شي.»
د کاسا زر پروژې بحثونه په ۲۰۰۶ میلادي کال کې هغه مهال پيل شول، چې قرغزستان او تاجکستان غوښتل له خپلې اړتیا زیاته برېښنا پر افغانستان او بیا له همدې لارې پر پاکستان وپلوري.
د کاسا زر پروژې تاسیسات به په افغانستان کې د ۵۸۰ کېلومترو په اوږدوالي سره د کندز له شیر خان بندر څخه د افغانستان شمال ته ننوځي او له کندز، بغلان، پنجشېر، کاپیسا، کابل، لغمان او ننګرهار له لارې پر تورخم پښتونخوا ته اوړي.
