له افغانستانه د امريکايي ځواکونو د وېستلو برخه کې امريکايي چارواکي ضد او نقيضې څرګندونې کوي، ولسمشر يې ژر وېستل غواړي او نظامي چارواکي يې بيا د مسولانه وتلو خبره کوي.
تازه د امريکا د پوځ لوی درستيز مارک مېلي له ان پي ار راډيو سره په يوه مرکه کې ويلي چې له افغانستان څخه د ځواکونو بهر کولو لپاره يو لړ پلانونه لري، چې ولسمشر ټرمپ سره یې هم شريک کړي دي.
د امريکا د پوځ لوی درستيز مارک مېلي وایي، ((موږ یو پلان لرو، د وتلو د مسولانه انتخاب لړۍ چې ولسمشر ته یې په اړه لنډیز ورکړل شوی. زه د راتلونکي لپاره مشخص شمېر ته نه ځم ، مګر موږ مسؤلیت لرونکی پلان لرو چې د امریکا ګټې پکې په روښانه توګه په پام کې نيول شوي او جګړه پای ته ورسوو.))
مارک مېلي دغه راز ويلي چې له افغانستان يې وتل په مشروط ډول دي او دوی له طالبانو سره شوې هوکړه له نږدې څاري.
نوموړي ویلي، (( که تاسو د فبروري ۲۸ نېټې هوکړه ليک ته زير شئ، یو شرط يې د بين افغاني خبرو پيل و، چې اوس مهال روانې دي، چې مهم ده. په امريکايي ځواکونو د بريدنو نه کول دي، په لويو ښارونو کې له بريدنو ډډه کول، القاعده سره اړيکې پرې کول او دې ته ورته نور شرطونه، چې موږ يې له نږدې څارو. د نطاميانو په توګه غوره نظامي مشورې له ولسمشر سره شريکوو، نو هغه کولی شي چې په دې اړه اګاهانه او له مسووليت ډکه پرېکړه وکړي.))
مارک مېلي دا خبرې وروسته له هغې کړي، چې امريکايي ولسمشر ډانلډ ټرمپ تېره اوونۍ له افغانستان څخه د ټولو امريکايي سرتېرو د ويستلو خبره کړې وه، چې ناټو يې هم په ځواب کې غبر ګون وښود او وې ویل چې ناټو خپل سرتیري شرایطو ته په کتو وباسي او د ځواکونو د وتلو په تړاو به هره پرېکړه په ګډه نیول کېږي.
له دې وړاندې د امريکا ولسمشر ډونالډ ټرمپ په ټوېټر لیکي وه چې له افغانستانه به ټول پاتې ځواکونه د مسيحيانو له اختر کرېسمېس مخکې وباسي.
د امريکا ملي امنيت سلاکار رابرټ اوبراين هم ويلي وو چې د نوي کال پورې به افغانستان کې د خپلو ځواکونو شمېر دوه نيم زرو ته راکم کړي.
