د قطر په پلازمېنه دوحه کې د افغانستان په تړاو د ملګرو ملتونو ناسته روانه ده، چې په دغه ناسته کې د سیمې او نړۍ د ګڼو هېوادونو ځانګړو استازو او یو شمېر پخوانيو افغان سیاسیونو او مدني فعالانو چې اوس په بهر کې مېشت دي او د افغانستان له اوسني نظام سره مخالف دي هم ګډون کړی.
د ملګرو ملتونو له لوري اسلامي امارت ته هم دغه ناسته کې د ګډون بلنه ورکړل شوې وه؛ خو اسلامي امارت یې د اجنډا او ترکیب په تړاو د وضاحت غوښتنه کړې وه چې ملګرو ملتونو په دې تړاو څه نه دي وړاندې کړي او کابل هم په کې د خپل نه ګډون پرېکړه وکړه.
کابل ملګرو ملتونو ته په ډاګه کړې وه، که اسلامي امارت د یوازیني مسوول لوري په توګه د افغانستان په استازیتوب ګډون کوي او په دغه ناسته کې د دواړو لوریو ترمنځ په لوړه کچه پر مسایلو د واضح خبرو زمینه برابره شي نو ګډون به یې د دوحې په ناسته کې ګټور وي.
خو بهرنیو چارو وزارت وايي، په دې برخه کې د ملګرو ملتونو له لوري هېڅ ډول پرمختګ ونه شو چې له امله یې د اسلامي امارت له لوري بې پایلې ګډون ګټور ونه بلل شو.
د بهرنیو چارو وزارت د ویاند مرستیال حافظ ضیا احمد تکل وايي: « د بهرنیو چارو وزارت ملګرو ملتونو ته واضحه کړې ده، که اسلامي امارت د یوازېني مسوول لوري په توګه د افغانستان په استازيتوب ګډون کوي او د دوحې ناسته کې د افغان پلاوي او د ملګرو ملتونو ترمنځ په لوړه کچه پر ټولو مسایلو د واضحو خبرو زمینه برابره شي؛ نو ګډون به ګټور وي خو په دې برخه کې د نه پرمختګ له امله د اسلامي امارت لخوا بې پایلې ګډون ګټور ونه بلل شو.»
تکل وايي، که ملګري ملتونه تر فشار لاندې را نه شي، د افغانستان عیني حقایق درک کړي او افغان حکومت د یوه خپلواک او داسې نظام په توګه ومني چې د تېرو هغو په څېر د چا تر اغېز لاندې نه راځي نو ممکن په خبرو کې پرمختګونه رامنځته شي.
هغه زیاتوي « که ملګري ملتونه موجوده حقایق درک کړي او یو څو محدودو لورو تر اغېز او فشار لاندې را نه شي او دا ټکی په پام کې ونیسي چې د افغانستان اوسنی نظام د تېر شل کلن رژیم په څېر د چا تر اغېز لاندې نه راځي؛ نو دا شونې ده چې د افغانستان اسلامي امارت سره په خبرو کې پرمختګ وشي.»
په ورته مهال د سیاسي چارو کارپوهان هم د اسلامي امارت دغه پرېکړه چې دوحې په ناسته کې یې ګډون ونه کړ پرځای ګڼي.
دوی وايي، په دغه ناسته کې د افغانستان د اوسني نظام له پلاوي سره د داسې خبرو زمینه نه وه مساعده شوې چې د قضیې د یوه لوري په توګه د سیاسي تعاملاتو او نورو شته ستونزو د حل پرسر خبرې وشي.
د سیاسي چارو کارپوه موسی سعادت وايي: « دا چې اسلامي امارت د دوحې په ناسته کې ګډون رد کړی، زما په نظر پر ځای کار دی، ځکه یو خو د ناستې اجنډا نه ده مالومه او بله دا چې د دوی مخالفین د مدني فعالانو په توګه هلته بلل شوې دي.»
افغان حکومت وايي، په دې باور وه چي په دوحه کې د ملګرو ملتونو پر مشرۍ او نوښت د افغانستان په تړاو د ګڼو هېوادونو د ځانګړو استازو ناسته یو بل ښه فرصت و چې د افغانستان د نظام او نړیوالو ترمنځ پر اختلافي مسایلو واضحې او په نتیجې ولاړې خبرې شوې وای؛ خو دغو خبرو ته د زمینې نه برابرېدو له امله افغان لوري د دوحې په ناسته کې ګډون ونه کړ.
د ملګر ملتونو له لوري د افغانستان په تړاو په دوحه کې روانه ناسته چې دوې ورځې به دوام وکړي، ګډونوال به یې د افغانستان په تړاو پر بېلابېلو مسایلو خبرې ولري؛ خو کتوونکي په دې باور دي چې ټولې هغه نړیوالې او سیمهییزې ناستې چې د افغانستان په تړاو جوړېږي د افغان حکومت د پلاوي له ګډون پرته پایله نه ورکوي.
