د کندهار په شاه ولیکوټ ولسوالۍ کې ۲۵ طالبان وژل شوي دي.
سوېل کې د ۲۰۵ اتل قول اردو ویاند خواجه یحیا علوي وايي، تېره شپه سلګونه وسله والو پلان درلود چې د شاه ولیکوټ ولسوالي د ” لوی کارېز” سيمه کې پر امنیتي او دفاعي ځواکونو بریدونه وکړي.
د علوي په خبره، د دوی ځواکونو د دغه پلان شنډ کړی او پر وړاندې يې د ځمکنیو او هوايي ځواکونو په عملیاتو کې ۲۵ طالبان وژل شوي او د هغوی یو شمېر وسلې هم له منځه وړل شوي دي.
له دې سره د لغمان په الیشنګ ولسوالۍ کې د هوایې برید له امله د لیزري سلاح درلودونکو په شمول ۳۳ وسله والو طالبانو ته مرګ ژوبله اوښتې.
والي ویاند اسد الله دولت زی وایي،تېره شپه د الیشنګ ولسوالۍ جیبون سیمه کې وسله والو طالبانو د امنیتي ځواکونو په پوسته ډلیز برید وکړ چې د دوی برید په شاه وتمبول شو او پرمهال یې د هوایې برید په پایله کې ۲۵ وسله وال طالبان وژل شوي او ۸ نور ټپیان شوي.
دولت زی وایې په وژل شویو کې ۵ تنه د لیزري سلاح کاروونکي وو.
د دولت زي په خبره په سیمه کې د وسله والو جسدونه پراته دي او له دوی څخه درنې او سپکې وسلې هم امنیتي ځواکونو ته په لاس ورغلي.
وسله والو طالبانو تراوسه دې راپورونو په تړاو رسینو ته څه نه دي ویلي.
