په اسلامباد کې د پاکستان احتساب ملي ادارې له لوري داييرې شوې ځانګړې محکمې د دې هېواد مخکېني لومړي زير عمران خان او د نوموړي مېرمنې بشرا بيبي ته ۱۴ – ۱۴ کاله بند سزا اورولې.
تېر ډيسمبر کې یادې ادارې د عمران خان او د نوموړي مېرمنې پر ضد له دې کبله په محکمې قضيه ثبت کړه، چې ګواکې په خپلې شتمنۍ کې يې له بهرنيو هېوادونو او چارواکو د ترلاسه کړو ډاليو په اړه مالومات نه دي ورکړي.
د عمران خان ګوند تحريک انصاف د محکمې دا پرېکړه ناعادلانه بللې او ويلي يې دي، چې د ورته ناعادلانه پرېکړو ځواب به دغلته راتلونکو پارلماني ټاکنو کې پر برياليتوب سره ورکوي.
د تحریک انصاف ګوند منشي عمرایوب خان وايي:« تاسې د رسنیو له لارې ولیدل، چې نن د محکمې لخوا د عمران خان او د هغه مېرمنې په هکله فیصله اعلان شوه او پر بند محکوم شول. محکمې پرون هم د دوی پر وړاندې فیصله کړې وه. تاسې مه وېرېږئ. موږ به د دغو فیصلو ځواب په ټاکنو کې له بریاليتوب سره ورکړو.»
د تحريک انصاف ګوند غړي که څه هم په ټاکنو کې د خپلو نوماندانو د بريا لپاره له ممکنه لارو هڅې کوي، خو د عمران خان او د نوموړي مېرمنې په اړه هم د محکمې د حکم د تطبيق ځنډولو لپاره لالهانده دي.
د عمران خان مدافع وکیل وايي:« په محکمې کې د عمران خان وکیل ته د ګواهي اجاره نه ده ورکړل شوې. محکمې د عمران خان او د هغه مېرمنې بشرا په نشتون کې فیصله اعلان کړې، چې دا د منلو نه ده او ردوو يې.» پر بند سربېره عمران خان او د نوموړي مېرمن د یو ملیارد ۱۵۸ کروړ کلدارې جرېمه کېدو ترڅنګ د لسو کلونو لپاره په دولتي چوکاټ کې له کار کولو هم منعه شوي او ترڅنګ يې پاکستان پخوانی بهرنيو چارو وزير شاه محمود قرېشي هم پر۱۰ کاله بند محکوم شوی دی.
اخوا د سیاسي چارو شنونکي بیا وايي، پاکستان په نظامي استبداد ولاړ هېواد دی او په خبره يې څو چې په پوره مانا دغلته قانون پلی نه شي، پاکستانیان به تل د پخواني چارواکو د محاکمو شاهدان وي.
د سياسي بېثباتۍ ترڅنګ په پاکستان کې امنيتي او اقتصادي بېثباتي هم ورځ تربلې د پراخېدو په حال کې ده.
تازه د پاکستان پارلماني ټاکنو ته نوماند او د تحريک انصاف ګوند غړی ريحان زېب د کمپاينې غونډې پرمهال د نامالومو وسلهوالو له لوري په داسې حال کې ترور شو، چې پاکستاني ځواکونو يې امنيت نيولی وه.
