له نولس کلنو کم عمره لوبډلې نړيوال جام سيالو کې له پرلپسې ماتو وروسته نانندرۍ راپورته کړي.
د ياد جام لپاره ټاکل شوې لوبډله د کرېکټ مينوالو او مبصرينو له جدي نېوکه سره مخ شوه او تر ډېره د دې ناکاميو ګوته د کرېکټ بورډ غواړي کمټې مشر اسدالله خان ته نېول کيده.
اسد الله خان له دې غبرګونونو وروسته پر خپله فیسبوک پاڼه وضاحت ورکولو ته اړ شو او يې وليکل، چې له نولس کلنو کم عمره لوبډلې په ټاکنه کې يې ونډه نه لرله.
هغه زیاته کړې:« زه له نولس کلنو کم عمره او يا د شل اوریزه ټيم لپاره مسوول نه يم؛ ځکه چې ما هېڅ نه دي جوړ کړي.»
د اسدالله خان دې څرګندونو د کرېکټ مېنوالو، مبصرينو او پخوانيو لوبغاړو ترمنځ په کرېکټ بورډ کې دننه د اختلافونو په اړه انديښنې پیدا کړې او هر يوه له کرېکټ بورډ څخه د وضاحت غوښتنه کوله.
د ملي لوبډلې پخواني لوبغاړي هستي ګل عابد پرخپله فیسبوک پاڼه له نولس کلنو کم عمره لوبډلې د ټاکوونکي ډلې په اړه پوښتلي او نه وضاحت يې د وطن پر برخليک لوبه کول بللي دي.
عابد زیاته کړې:« د کرېکټ په اداره کې د ۱۹کلنو د لوبډلې د انتخاب زموار څوک شو؟ د وطن پر سرنوشت لوبه کوونکي دې ازاد ګرځي.»
د غواري کمېټې د مشر اسدالله خان له څرګندونو وروسته کرېکټ بورډ خپل نوی تصيمم اعلان کړ او د نوموړي پرځای يې پخوانی لوبغاړی احمدشاه سليمانخېل د يادې کميټې سرپرست په توګه وټاکه.
ورزشي خبريال او مبصر جعفر هاند پرخپله ټویټرپاڼه دا پريکړه حیرانوونکي او خواشينونکې بللې او د پوښتنې په توګه يې ويلي، چې د کرېکټ بورډ د غواړي کمېټې د مشر صلاحيت دا وي نو د نورو به څه حال وي؟
په ورته مهال د کرېکټ يو شمېر نور مبصرين نېوکه کوي، چې د ملي او نورو لوبډلو لپاره د لوبغاړو په ټاکلو کې ځانګړی معيار په پام کې نه نېول کيږي او غیر مسوول کسان لوبغاړي انتخابوي.
له دې ننداريو سره سره کرېکټ بورډ د سريلانکا پر وړاندې ټيسټ سياليو لپاره شپاړس کسيز نوملړ اعلان کړی، چې تر ډېره په کې نويو ځوانانو ته ځای ورکړل شوی دی.
خو پر دې نوملړ هم نېوکې شوي، د کرېکټ پخواني لوبغاړي باطن شاه عبدالرحيمزي دا انتخاب د ځينو افغان وړتيا لرونکو لوبغاړو په حق کې ښکاره ظلم بللی دی.
