د مصالحې عالي شورا له دفتر څخه په خپره شوې اعلامیه کې راغلي، چې د لویې جرګې ګډونوالو پرېکړه کړې ده چې پاتې ۴۰۰ طالب بندیان دي خوشې کړل شي.
(اعلامیه کې راغلي چې هغه مشورې او وړاندیزونه چې د سولې مشورتي لویې جرګې غړو له لورې مطرح شوي، په لاندې ډول دي.
((ـ باعزته او دایمي سولې ته د رسېدو لپاره پکار ده، چې ټولې خوا وې انعطاف وکړي.
ـ پاتې ۴۰۰ طالبن بندیان دې خوشې شي، ترڅو د سولې لپاره هیڅ بهانه پاتې نشي.
ـ د طالب بندیانو د خوشې کېدو په صورت کې دې پرته له قېد او شرط څخه اوربند وشي او دواړه خوا وې دې ورته ژمنې پاتې شي.
ـ د سولې خبرې دې څومره چې ژر کیږي پیل شي.
ـ د سولې یو داسې مرکچې پلاوی دې وټاکل شي، چې ټول شموله وي او د تېرو ۱۹ کالو ارزښتونو څخه دفاع وکولی شي.
ـ د افغانانو په مشرۍ دې د سولې خبرو پیل لپاره افغانستان ته لومړیتوب ورکړل شي.
ـ د افغانستان په قضیه کې ښکیلې غاړې دې د طالبانو له ملاتړ څخه لاس واخلي او جګړې ته دې لمن نه وهي.
ـ بندیان دې د ملي او نړیوال ضمانت په صورت کې خوشې کړای شي، ترڅو بیا د وسله والو په لیکو کې فعالیت ونکړي.
ـ نړیواله ټولنه دې د سولې خبرو له پیل او په هېواد کې د دایمي سولې راوستلو په برخه کې ضمانت وکړي.
ـ د امنیتي ځواکونو هغه بندیان چې د حکومت په زندانونو کې دي د ملي روحیې د پیاوړي کولو لپاره دې خوشې شي.
ـ د سولې په خبرو کې دې د تېرو ۱۹ کالونو له لاسته راوړنو او جمهوریت څخه په کلکه دفاع وشي.
ـ د اساسي قانون او په ځانګړي ډول د اساسي قانون د دویم فصل څخه چې ولسواکي ده په کلکه دفاع.
ـ د افغانستان د خلکو له حقونو په ځانګړي ډول د ښځو د حقونو څخه دفاع.
ـ د بیان ازادۍ او د رسنیو ازادۍ خوندي کول.
– د سولې په خبرو کې پرمختګونه د ولس سره باید پر وخت شریک شي.
– حکومت دې د جګړې د قربانیانو رضایت ترلاسه کړي.
ـ د سولې په خبرو کې د ټولنې د ټولو قشرونو د غړو شاملول په ځانګړي ډول د میرمنو او هم باید مرکچي پلاوی د خبرو کولو توانمندي ولري.
ـ د سولې هوکړه دې د نړیوالې ټولنې او د نړۍ د قدرتونو او د سیمې هېوادونو تر نظارت لاندې وشي.))
په اعلامیه کې دغه راز راغلي چې د جرګې ګډونوالو ویلي چې دوی په هېواد کې د تلپاتې او باعزتې سولې د راتګ لپاره پداسې حال کې د ۴۰۰ طالب بندیانو له خوشې کېدو سره هوکړه کوي، چې نړیواله ټولنه یې ضمانت وکړي.
د جرګې ګډونوالو همدا راز ویلي چې د طالب بندیانو خوشې کېدل پدې معنا ندي، چې د دوي جرمونه به بخښل کیږي.
