د پوهنې او لوړو زدهکړو وزارتونو د جهادي مدارسو او ديني علمانو شورا په همکارۍ د هېواد پر کچه د مدرسو له زدهکوونکوعمومي ازموینه واخېستله.
په دې ازموینه کې ۵۰ زره طالبالعلمانو ګډون کړی و چې په کې د ثانوي، عالمیه او عالیه درجو زدهکوونکو څخه په خپلو مربوطه ولایتونو کې ازموینه واخېستل شوه.
د لوړو زدهکړو وزارت ویاند ضیاء الله هاشمي وايي، یاده ازموینه په درېیو کټګوریو کې ترسره شوې او بریالیو کسانو ته به د دولسم ټولګي، لېسانس او ماسټرۍ سندونه ورکړل شي.
هاشمي زیاتوي: « په ټولو ولایتونو کې د عالمیه، عالیه او ثانوي درجې ازموینه اخلي، د یادونې وړ ده، چې په یاده ازموینه کې نږدې ۵۰ زره کسان ګډون کوي. د لوړو زده کړو او پوهنې وزارتونو له لوري ټاکل شوي ټیمونه ټولو ولایتونو ته استول شوي او بشپړ چمتووالی لري. موږ طالبالعلمانو او علماوو کرامو ته ډاډ ورکوو چې یاده پروسه به کاملا شفافه او په عادلانه توګه ترسره کېږي.»
خو د پوهنتون استادان وايي، اړتيا ده چې له ورته ازموينو وړاندې د مدرسو او ښوونځيو د نصابونو مقايسوي ارزونه وشي او په پایله کې يې د زدهکوونکو د سويې تثبيت په موخه معيارونه تعريف شي.
د پوهنتون استاد اسلم دانشمل وايي: « دوی ته باید یو لړ معیارونه وټاکل شي او د هغو معیارونو پر بنسټ له دوی ازموینه واخېستل شي او مشخصاً په همدې برخه کې دوی ارزیابي شي او اسناد ورکول شي، ځکه که دوی ته د لېسانس سند ورکول کېږي نو د کوم معیار پر بنسټ دا سند ورکول کېږي، او وکتل شي، چې ایا د مدارسو نصاب د شریعاتو پوهنځي له نصاب سره څومره برابر دی.»
ځيني نور کارپوهان بيا وايي، دا چې په ازموينه کې ګډنوالو کسانو د ديني زدهکړو نصاب لوستی، نو په همدې برخه کې دې يې سويه تثبيت او دغه راز دې د لوړو زدهکړو په موخه په پوهنتونونو کې د شرعياتو پوهنځيو ته جذب شي.
د پوهنتون استاد محمد اصف ستانکزی وايي: « دې لپاره چې ورته نورو پوهنځیو کې دوی زده کړې وکړي؛ نو ښه به دا وي چې اسلامي امارت د مدرسو په نصاب کې عصري علومو ته هم ځای ورکړي، څو په راتلونکې کې دا زده کوونکي په عصري علومو، لکه: د ډاکټرۍ، انجنیرۍ، حقوقو، سوداګرۍ او اقتصاد په برخه کې هم مثبت او اغېزناک ثابت شي او د افغانستان لپاره یوه پانګه شي.»
دا ازموینه په داسې حال کې اخېستل کېږي، چې له دوو کلونو راپدېخوا د نجونو پرمخ د ښوونځیو او کابو یوه کال راهېسې د پوهنتونونو دروازې تړل شوي دي او د خلکو له غوښتنو سربېره هم د زدهکړو اجازه نه ده ورکړل شوې.
