اسلام اباد کې د هغو بلوڅ لاریون کوونکو مخه نیول شوې، چې له بلوچستانه د زرګونه کسانو په حضور سره د اسلام اباد د ناسمو تګلارو او چلن پر وړاندې پیل شوی.
د بلوڅ لاریون کوونکو پر وړاندې د پاکستان د حکومت او پوځ چلن په نړیوال کچه غندل شوی او له اسلام اباد غوښتل شوي چې نیول شوي لاریون کوونکي هر څه ژر ازاد کړي.
د بښنې نړیوال سازمان ويلي، پر لاریون کوونکو اوښکې بهوونکي ګاز کارېدنه، وهل ډبول، د لاریون کوونکو بندي کول د اعتراض د اصولو خلاف عمل دی.
یاد سازمان زیاته کړې:« د ډیسمبر په ۲۱مه اسلاماباد کې د بلوڅ لاریون کوونکو پر وړاندې د حکومتي ادارو له خوا په ناقانونه توګه ناوړه چلن اندېښمن کړي یوو او د ټولو نیول شویو لاریون کوونکو د ازادېدو غوښتونکي یو.»
له دې سره د نوبل جایزې ګټونکې او د بشري حقونو فعاله ملاله یوسفزۍ وايي، لاریون د بلوڅو حق دی او هغه بلوڅ وروڼه او خویندې چې د پاکستان حکومت بندیان کړي، بايد ژر تر ژره خوشې شي.
یوسفزۍ زیاته کړې:« زه له خپلو بلوڅو خویندو سره ولاړه یم، چې د بېدرکه شویو کسانو د ازادېدو غوښتنه کوي. سولهییز لاریون یې حق دی او غږ یې باید واورېدل شي.»
د دې ترڅنګ د بلوڅ لاریون کوونکو مشره ماه رنګ وايي، د پاکستان حکومت د لاریون کوونکو پر وړاندې غیر انساني غبرګون ښودلی او ډېر ځوانان یې له وهلو ډبولو وروسته بندیان کړي.
هغې زیاته کړې:« پاکستاني پوځ د شپې زموږ پر لاریون کوونکو حمله وکړه، لاریون کوونکي له وهلو ډبولو وروسته زندان ته یووړل شول او هلته د څارویو نه هم ناوړه چلن ورسره کېږي.»
پاکستاني چارواکي وايي، د بلوڅ لاریون کوونکو د مشرې ماه رنګ په ګډون ۲۱۸ کسانو څخه چې د چهارشنبې په لاریون کې یې برخه اخېستې وه، ډېری هغه لاریون کوونکي یې ازاد کړي چې پېژندګلوي یې شوې او د کومو پېژندګلوي چې نه ده شوې، لا هم بندیان دي.
