د کورنیو چارو وزارت وايي، د روان کال له پیل راهیسې په افغانستان کې د ۳۷۳ ماینونو د چاودنو له امله ۹۸ ملکي وګړي وژل شوي دي.
د کورنیو چارو وزارت ویاند طارق ارین نن یوې خبري غونډې ته وویل چې د تېر کال په پرتله، سږ کال د سړک د غاړې او مقناطیسي ماینونو په چاودنو کې ۲۶ سلنه زیاتوالی راغلی دی.
د کورنیو چارو وزارت ویاند ټینګار وکړ چې ماین خښوونکو تر شا کوچنۍ او لویې ډلې او سازمانونه د پولیسو لخوا تعقیب لاندې دي.
طارق ارین زیاته کړه چې یو تعداد ماین خښوونکي نیول شوي هم دي، خو د کره شمېر په اړه یې څه ونه ويل.
د هغه په وینا، تېره اوونۍ په کابل کې د جنایي مجرمینو پر ضد ۱۰۳ نظامي عملیاتونه ترسره شوي چې په پایله کې یې ۱۹۳ تنه په جنایي جرمونو کې د لاس لرلو په تور نیول شوي دي.
باور دادی چې ډیری وخت د سړک د غاړې او مقناطيسي ماینونو د چاودنو په پایله کې ملکي وګړو ته تلفات اوړي.
په ورته وخت کې، کابل کې د ملګرو ملتونو مرستندویه پلاوي یا یوناما او د بشري حقونو سازمانونو په وار وار د جګړې ښکېلکو خواوو څخه غوښتي چې د سړک د غاړې او مقناطیسي ماینونه دي نه کاروي.
