د افغانستان لپاره د امریکا ځانګړي استازي زلمي خلیلزاد هیله څرګنده کړي چې د سولې مذاکراتو په پایله کې به افغانستان کې سوله تامین شي.
د واشنګټن ټایمز د راپور له مخې، زلمي خلیلزاد ویلي دي: ((مونږ په یو ښه ځای کې قرار لرو، د سختیو او ستونزو سره سره بیا هم مونږ د بین الافغاني خبرو د پیل په لوري روان یو.))
خلیلزاد د اختر درې ورځني اوربند په تړاو ویلي، اوربند بین الافغاني مذاکراتو ته لاره هواره کړي ده او له اوربند را په دېخوا په تاوتریخوالی کې هم کموالی راغلی دی.
خلیلزاد په خپلو خبرو کې دا هم ویلي، چې د اوربند په پایله کې د طالبانو او افغان حکومت ترمنځ د بندیانو د خلاصون لړۍ پیل شوې او افغان حکومت شاوخوا ۲۵۰۰ او طالبانو بیا لږترلږه ۴۰۰ بندیان خوشې کړي دي.
دا په داسې حال کې ده چې د امریکې ولسمشر ډونالډ ټرمپ څو ځله د اعتراض په ډول ویلي چې امریکایي ځواکونه افغانستان کې د پولیسو رول لوبوي او باید بیرته خپل هېواد ته راستنه کړل شي.
ټرمپ ویلي و: ((مونږ خپل سرتیري وباسو، خو وضعیت له نژدې څارو او که چیرې اړتیا شوه، د تندر په څیر به بیرته ور وګرځو.))
په ورته وخت کې د ملګرو ملتونو يو راپور کې راغلې چې د القاعده ځينې مشران لا هم افغانستان کې حضور لري او طالبانو بیا له دوی سره نژدي اړیکې ساتلې دي.
دغه راز په راپور کې ویل شوي دي، طالبانو د ۲۰۱۹ کال په پای او د ۲۰۲۰ کال په سر کې له القاعده سره ناستې کړي او پر عملیاتي پلانونو، تمریناتو او په افغانستان کې د القاعدې غړو ته د پناه ورکولو په تړاو یې خبرې کړي دي.
وسله والو طالبانو بیا تر دې مهاله د ملګرو ملتونو د امنیت شورا د دې ادعا او دغه راز د خلیلزاد څرګندونو په تړاو څه نه دي ویلي.
