افغان حکومت له طالبانو نه د سلګونه افغان ځواکونو د ژوند او مرګ په اړه وضاحت غواړي.
افغان حکومت وايي طالبانو تر اوسه د زندانیانو د خلاصون برخه کې تعهدات نه دي عملي کړي او تر هغې چې دغه ډله ۲۰۰ افغان امنیتي ځواکونه ازاد نه کړي د حکومت له زندانونو به هم نور طالب زندانیان ونه وځي.
ملي امنیت شورا له طالبان د سلګونه هغو زندانیانو د ژوند او مرګ په اړه وضاحت وغوښت چې دوی یې لیست ور سپارلی دی.
د ملي امنیت شورا ویاند وايي، طالبانو تر اوسه د هوکړې مطابق زندانیان نه دي ازاد کړي او دوی هم د طالب بندیانو د خلاصون پروسه درولې ده.
جاوید فیصل داسې وویل (( هغه لیست چې د افغان دولت له لوري طالبانو ته سپارل شوي تر اوسه د هغه مطابق زندانیان نه دي ازاد شوي. طالبان باید ملت او نړیوالې ټولنې ته د هغو ۶۱۰ تنه زندانیانو په اړه وضاحت ورکړي چې د دوی لخوا نیول شوي دي. طالبانو تر اوسه د هغو زندانیانو په اړه وضاحت ندی راکړی چې ایا ژوندي دي، وژل شوي او که په چا یې پلورلې دي.))
د ملي امنیت شورا ویاند یو ځل بیا په طالبانو نیوکه وکړه، چې تاوتریخوالي ته یې دوام ورکړی او سولې ته هیڅ ژمنتیا نلري.
جاوید فیصل داسې وویل (( موږ په وار وار له طالبانو د اوربند غوښتنه وکړه، د سولې لپاره مو مذاکراتي ټیم اعلان کړ او طرحه مو هم وړاندې کړه خو طالبان تر اوسه د سولې لپاره نه طرحه لري او نه یې کوم عملي اقدام کړی بلکې اوس هم په تاوتریخوالي باورمند دي.))
خو قطر کې د طالبانو د سیاسي دفتر ویاند سهیل شاهین په یو ټویټ کې ویلي چې نن او تېره ورځ یې په فاریاب او بادغیس ولایتونو کې د افغان دولت ۵۳ تنه زندانیان ازاد کړي دي.
سهیل شاهین داسې لیکلي (( د افغانستان اسلامي امارت د بندیانو د خلاصون د پروسې په لړ کې، نن او پرون هم ۵۳ تنه بندیان په فاریاب او بادغیس ولایتونو کې خوشې کړل. چې هریوه تن ته یې جامې او ۵۰۰۰ افغانۍ د لارې کرایه ورکړل شوه.))
که څه هم دبندیانو د خلاصون بهیر خلکو سره تمې پیدا کړي چې جګړه به کمه شي او بین الافغاني خبرې به پیل شي خو تر اوسه دغه اقدام جګړه نه یوازې چې کمه کړې نده بلکې د جګړې سنګرونه هم ورسره ګرم شوي دي.
په ټوله کې د جګړې له خواوو غوښتنه کېږي چې د قطر هوکړه دې عملي کړي، د زندانیانو د خلاصون بهیر دې چټک کړي، تاوتریخوالی دې کم کړي تر څو بین الافغاني خبرو ته ور پرانیستل شي.
