د امريکا بهرنيو چارو وزارت د ۲۰۲۲ کال د ترهګرۍ په اړه په خپاره کړې راپور کې ادعا کړې چې لا هم په افغانستان کې يو شمېر هغه ډلې فعالې دي، چې فعاليتونه يې په سيمه کې متمرکز دي.
راپور کې ويل شوي چې په افغانستان کې د القاعده عناصر، داعش او په سيمه کې متمرکزې ترهګرې ډلې فعالې دي او زياته شوې چې داعش ډلې په افغانستان کې پر حکومتي چارواکو سربېره د عام افغانانو په ځانګړې توګه د اهل تشيع په نښه کولو ته دوام ورکړی.
د راپور یوه برخه: « د داعش خراسان څانګې د طالبانو او د ملکي افغانانو او په ځانګړې توګه اهل توشيع په نښه کولو ته دوام ورکړی، په ځانګړې توګه القاعده د هند په نيمه وچه کې که څه هم فعاله ده، خو دا وړتيا نه لري چې له افغانستانه پر امريکا په مستقيمه توګه بريد وکړي.»
د سیاسي چارو کارپوهان په افغانستان کې اوسني امنيتي وضعيت ته په کتو د امريکا ياده ادعا بې ساسه بولي او زياتوي چې د وسلهوالو ډلو د حضور او فعاليت په صورت کې د سرتاسري امنيت ټينګښت سخت کار دی، خو په خبره يې موجوده امنيتي وضعيت د امريکا دا ادعا برعکس ثابتوي.
د سیاسي چارو کارپوه اخترمحمد راسخ وايي: « دوی خبره نږدې د پاکستان د استخباراتو له کړنو او له استخباراتي پرګرامونو سره سمه روانه کړې، ترڅو افغانستان د امن او سولې تر عنوان لاندې په نړیوال بیز کې ثبت او راجسټر نه شي.»
خو ځینې نور بيا د امريکا د يادې ارزونې او ادعا په پلوۍ وايي، سرپرست حکومت دې يادو ادعاو ته په سطحي نظر نه ګوري.
دوی زياتوي، د وسلهوالو ډلو حضور د افغانستان راتلونکی له ابهام سره مخ کوي او اړتيا ده، چې حکومت يې په اړه نړيوالو ته وضاحت ورکړي.
د سیاسي چارو کارپوه اسدالله نديم وايي:« د امریکا بهرنیو چارو وزارت کلني یا ربعوار راپورنه چې خپرېږي، د امریکا د حکومت له سیاسي نظرونو او دریځونو خالي نه وي او دا هم سمه ده چې ډېری شبکې چې د ترهګریزو شبکو په نامه یادېږي مخکې یې له طالبانو سره نږدې اړیکې درلودې.»
خو د افغانستان سرپرست حکومت د امريکا بهرنيو چارو وزارت دې راپور په ردولو سره وايي، په افغانستان کې هېڅ ډله فزيکي حضور نه لري او په خپل تېر دريځ چې د افغانستان خاوره به د نورو هېوادونو پر ضد نه کارېږي، ټينګار کوي.
د اسلامي امارت وياند ذبيحالله مجاهد وايي: « په دغه راپور کې چې د افغانستان په اړه کوم مالومات ورکول شوي؛ سم نه دي موږ یې ردوو او واقعیت دا دی چې د افغانستان اسلامي امارت هېڅ چاته اجازه نه ورکوي چې د افغانستان خاوره د چا پر وړاندې وکاروي او نه داسې ډلې شته چې د چا لپاره ګواښ وي. په دې اړه چې کومې څرګندونې شوې یا یې مالومات ناسم دي او یا دا چې تبلیغات کوي.»
له دې وړاندې امريکا او ملګرو ملتونو له ترهګرۍ سره په مبارزه کې د سرپرست حکومت هڅې ستايلي او زياته کړې يې ده، چې ياد حکومت په نشتو امکاناتو سره د داعش ډلې پر وړاندې پرېکنده عمل کړی دی.
