د طالبانو له اړخه سرتیرو ته له درنې مرګ ژوبلې وروسته امنیتي او دفاعي بنسټونه فعال دفاعي حالات ته ستنیږي.
د سولې مذاکراتو ته د داخلېدو په نن او سبا کې شل ورځې تېرې شوې، خو دواړه لوري ونه توانېدل چې د امریکا او طاالبانو د هوکړې سره سم د افغانانو ترمنځ خپلمنځۍ خبرې پیل شي.
اوس درې اونۍ وروسته داسې ښکاري چې جګړې شدت موندلی او د وسلوالو په تازه پېښو کې د پوځ ۹ سرتیري په زابل او ۵ په هلمند کې وژل شوي دي.
دفاع وزارت طالبان وننګول چې د دوحې هوکړې ته یې درناوی نه دی کړی او دوی اړ دي چې د خپلې جګړې لوری بدل کړي.
د ملي دفاع وزارت مرستیال ویاند فواد امان داسې وویل (( بدبختانه طالبانو د قطر هوکړې خلاف پر افغان امنیتي او دفاعي ځواکونو خپلو بریدونو ته دوام ورکړی او امریکا سره هوکړه یې نقض کړې ده. خو افغان امنیتي او دفاعي ځواکونه د قطر هوکړې ته په درناوي په دفاعي حالت کې قرار درلود، خو کله چې پوه شو چې طالبانو خپلو بریدونو ته ادامه ورکوي موږ فعال دفاعي حالت ته تللي یوو.))
افغانستان کې د کرونا ویروس له امله تمه دا وه چې جګړه ودریږي، خو د تمې خلاف د جګړې لیکې فعالې دي.
طالبانو وړمه ورځ ادعا کړې چې حکومت په باګرام زندان کې د دوی ملګري شکنجه کړي یو یې وژلی او خبرداری یې ورکړ که زندانونو کې د دوی له بندیانو سره چلند ښه نه شي دوی به د غچ اخیستو لپاره پوځي ګام پورته کړي.
اوسمهال افغان امنیتي ځواکونه د طالبانو له لوري بریدونو ته په دفاعي حالات کې دي او که بریدونه دوام کوي نو امنیتي بنسټونه چمتو دي چې تعرضي عملیات پيل کړي.
ټینګار دا دی چې د جګړې پرځای دې د سولې خبرو پیل لپاره کار واخستل شي. افغانان له جګړې وروسته اوس د کرونا ویروس له امله قرباني ورکوي چې په نړیواله کچه یو مرګوني ناروغي ده.
