طالبانو ادعا کړې چې بګرام زندان کې یې بندیانو سره زور زیاتی کېږي.
د سولې لپاره په رامنځته شوي نازک فرصت کې د حکومت او طالبانو لخوا پر یو بل د بهانو او له بندیانو سره د ناسم چلند راپورنه خپریږي.
طالبانو ادعاء کړې چې له تېرو څو ورځو راهیسې باګرام زندان کې له طالب بندیانو سره زور زیاتی پيل شوی، چې بندیان افتابۍ او نور حقه حقوقو ته نه پرېښودل کیږي.
طالبان وايي، حکومت په بګرام کې د دوی یو بندي ملګری وژلی او یو شمېر نور یې سخت وهلي ډبولي دي.
د طالبانو د بندیانو کمېسیون ویلي، که د دوی له ملګرو سره زور زیاتی دوام وکړي، د خپلو ملګرو غچ به واخلي.
افغان حکومت وايي، د طالبانو دا ادعا د سولې مذاکراتو لپاره یوه پلمه ده چې و یې ځنډوي.
طالبانو داسې ویلي (( موږ د سور صلیب په نړیواله اداره، د بشر حقونو په ټولنو او نورو خیریه بنسټونو غږ کوو چې له مظلومو بندیانو سره د دغه ناوړه چلند مخه ونیسي، د بندیانو د اړتیاوو د پوره کېدو لپاره عاجل لاس په کار شي))
هڅه مو وکړه د دې ادعا په تړاو د امنیت شورا نظر واخلو خو بریالي نشو.
د ولسمشر سلاکار وحید عمر بیا له بندیانو سره د ناوړه چلند ادعا رد او تایید نه کوي خو وايي، دا مسله د نورو بهانو په څېر د طالبانو لخوا یوه بهانه ده.
د ولسمشر ځانګړي سلاکار وحید عمر داسې وویل (( په دې حساس وخت کې چې زموږ لخوا ټول کارونه شوي د طالبانو لخوا داسې پلمې جوړول به د سولې پروسې سره کمک و نه کړي او دا د پلمو یو جز دی.))
د بشري حقوقو څارونکي په زندانونو کې له زندانیانو سره زیاتی د بشري حقونو خلاف عمل ګڼي، وايي دا ډول حرکات نازک وضعیت ته صدمه رسولی شي.
د افغانستان د بشري حقونو سازمان رییس لعل ګل لعل داسې وویل (( دا لومړۍ پېښه نه ده په تیرو نولس کلونو کې دې ته ورته پېښې شوي او هر لوری چې ملامت وي موږ یې ملامتوو او دا ډول پېښې غندوو. موږ یو وار بیا له دواړو خواوو غواړو چې زندانیانو سره دې سم چلند وکړي او ستونزې دې د خبرو له لارې حل کړي.))
د مالوماتو له مخې د افغان حکومت په زندانونو کې لږ تر لږه څلوېښت زره بندیان شته دي چې شاخوا پنځلس زره یې سیاسي بندیان یادیږي.
